ކަޅު ބާޒަރުގައި ޑޮލަރު ވިއްކި އިތުރު ދެ ބިދޭސީއަކު ޑިޕޯޓްކުރަނީ

ކަޅު ބާޒާރުގައި ޑޮލަރު ވިއްކި މައްސަލައެއްގައި އަނެއްކާވެސް އިތުރު ދެ ބިދޭސީއަކު ހައްޔަރުކޮށް އެ މީހުން ޑީޕޯޓްކުރަން މޯލްޑިވްސް އިމިގްރޭޝަނުން ނިންމައިފިއެވެ. އިމިގްރޭޝަނުން މިއަދު "އެކްސް" ގައި ކުރި ޕޯސްޓެެއްގައި ބުނީ އެމީހުން އަތުލައިގަތީ، މާލޭގެ ޑޮލަރު އޭޓީއެމެއް ކައިރިން އިއްޔެ ކަމަށާއި މިއީ އިމިގްރޭޝަނާއި ފުލުހުން ގުޅިގެން ހިންގި ސްޕެޝަލް ރެއިޑު އޮޕަރޭޝަންގެ ދަށުން ހައްޔަރުކުރި ދެ މީހުން ކަމަށެވެ. އަދި ހައްޔަރުކުރި ދެ މީހުންނަކީ ރާއްޖޭގައި ގަވާއިދާ ހިލާފަށް އުޅެމުން އަންނަ ބަންގްދަލޭޝްގެ ބައެއް ކަމަށް ވެސް ބުނެފައިވެއެވެ. https://twitter.com/ImmigrationMV/status/1808706629514506558 އެގޮތުން، އިމިގްރޭޝަނުން ބުނީ އެ މީހުންގެ މައްސަލަ މިހާރު ތަހުގީގުކުރަމުން އަންނާތީ ޑީޕޯޓް ކުރެވެން ދެން ބަންދުގައި ބަހައްޓާފައިވާ ކަމަށެވެ. ކަޅު ބާޒާރުގައި ޑޮލަރު ވިއްކި މައްސަލާގައި އިތުރު ދެމީހަކު ޑީޕޯޓްކުރަން ނިންމާފައިވާއިރު، މިދިޔަ މާޗް މަހުގެ ތެރޭގައި މި މައްސަލައިގައި ވަނީ ހަ ބިދޭސީއަކު ޑީޕޯޓުކޮށްފައެވެ.