ޓެކްސް ނޫން އާމްދަނީގެ ގޮތުގައި މެއިމަހުގެ ނިޔަލަށް ދައުލަތަށް 1.6 ބިލިއަން ރުފިޔާ ލިބުނު: މީރާ

ޓެކްސް ނޫން އާމްދަނީގެ ގޮތުގައި މިއަހަރުގެ މެއިމަހުގެ ނިޔަލަށް ދައުލަތަށް 1.6 ބިލިއަން ރުފިޔާ ލިބިފައިވާކަމަށް ޓެކްސް އިދާރާގެ ތަފާސްހިސާބުތަކުން ދައްކައިފިއެވެ. މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކަށް ބަލާއިރު، ހުސްވި މެއިމަހުގެ ނިޔަލަށް ދައުލަތަށް ބަލައިގަތް ޓެކްސް ނޫން އާމްދަނީ 1.6 ބިލިއަން ރުފިޔާއަށް އަރާއިރު، މިއީ މިދިޔަ އަހަރުގފެ މި މުއްދަތާ އަޅާބަލާއިރު، 13 އިންސައްތައިގެ އިތުރުވުމެކެވެ. މިދިޔަ އަހަރުގެ ފުރަތަމަ ފަސް މަސްދުވަސް ނިމިގެންދިޔައިރު ޓެކްސް ނޫން އާމްދަނީގެ ގޮތުގައި ދައުލަތަށް ލިބިފައިވަނީ 1.4 ބިލިއަން ރުފިޔާއެވެ. މިއަހަރުގެ މިހާތަނަށް ޓެކްސް ނޫން އާމްދަނީގެ ގޮތުގައި ދައުލަތަށް އެންމެގިނައިން އާމްދަނީ ލިބިފައިވަނީ، ޓޫރިޒަމް ލޭންޑް ރެންޓް، އެއާޕޯޓް ޑިވެލޮޕްމަންޓް ފީ، ވަރކްޕާމިޓްފީގެ އިތުރުން ކޯޓާފީންނެވެ. އެންމެގިނައިން ޓެކްސް ނޫން އާމްދަނީ ލިބުނު ދާއިރާތައް:

• ޓޫރިޒަމް ލޭންޑް ރެންޓް: 566.3 މިލިއަން ރުފިޔާ
• އެއާޕޯޓް ޑިވެލޮޕްމަންޓް ފީ:508 މިލިއަން ރުފިޔާ
• ވަރކްޕާމިޓް ފީ:257 މިލިއަން ރުފިޔާ
• ކޯޓާ ފީ:154 މިލިއަން ރުފިޔާ

ޓެކްސް ނޫން އާމްދަނީގެ ގޮތުގައި މިއަހަރުގެ ފުރަތަމަ ފަސްމަސް ދުވަހު ދައުލަތަށް 1.6 ބިލިއަން ރުފިޔާ ލިބިފައިވާއިރު، ޓެކްސް އާމްދަނީގެ ގޮތުގައި މިއަހަރުގެ މިހާތަނަށް 10.9 ބިލިއަން ރުފިޔާ ވަނީ ލިބިފައެވެ. މިއަހަރުގެ ބަޖެޓް ފޮތަށް ބަލާއިރު، ޓެކްސް ނޫން އާމްދަނީގެ ގޮތުގައި 6 ބިލިއަނަށްވުރެ ގިނަ ރުފިޔާ ލިބޭނޭކަމަށް ވަނީ އަންދާޒާކޮށްފައެވެ. މިއަހަރުގެބަޖެޓަށް ބަލާއިރު ޖުމްލަ އާމްދަނީގެ ގޮތުގައި 33.5 ބިލިއަން ރުފިޔާ ލިބޭނޭކަމަށް ވަނީ ބަޖެޓްގައި ހިސާބު ޖަހާފައެވެ.