ރަސްމާލެ ހިއްކުމުގެ މަސައްކަތް އުއްމީދުކުރިގޮތަށް ނުދިޔަކަމަށް ސަރުކާރުން އެއްބަސްވެއްޖެ

ރަސްމާލެ ހިއްކުމުގެ މަސައްކަތް ސަރުކާރުން އުއްމީދުކޮށް ރޭވިގޮތަށް ކުރިއަށް ނުދިޔަ ކަމަށާއި، އެ މަޝްރޫޢު ކުރިއަށްގެންދެވޭނެ އިތުރު ގޮތެއް ހޯދަމުންދާކަަށް ކޮންސްޓްރަކްޝަން އެންޑް ޕްލޭނިން މިނިސްޓަރު ޑރ. އަބްދުﷲ މުއްތޮލިބު ވިދާޅުވެއްޖެއެވެ. ރަސްމާލެ މަޝްރޫއުގެ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގެން މިދިޔަ ޑިސެމްބަރުމަހުގެ 18 ވަނަ ދުވަހުއެވެ. ރަސްމާލެ ހިއްކަން ފެށުމާއެކު ސަރުކާރުން ބުނަމުން އައީ 8 މަސްދުވަހުގެ ތެރޭގައި އެތަން ހިއްކައި ނިމޭނޭ ކަމަށެވެ. ރަސްމާލެ މަޝްރޫޢު ކުރިއަށްދާ ގޮތާއި ބެހޭގޮތުން މިއަދު ނޫސްވެރިންނަށް މައުލޫމާތު ދެއްވަމުން މުއްތޮލިބު ވިދާޅުވީ، ކުރިން 8 މަސްދުވަހުގެ ތެރޭގައި ރަސްމާލެ ހިއްކައި ނިމޭނޭކަމަށް އޮތްނަމަވެސް މިހާރު އެ މުއްދަތުގެ ތެރޭގައި އެތަން ހިއްކާ ނުނިމޭނޭ ކަމަށެވެ. މިނިސްޓަރު ވިދާޅުވީ ރަސްމާލެ ހިއްކުމުގެ މަސައްކަތް ކުރިއަށްގެންދާނެ އިތުރު ގޮތްތަކެއް ސަރުކާރުން ހޯދަމުން އަންނަ ކަމަށާއި، އެކަން ނުކުރެވުނު މައިގަނޑު ސަބަބަކީ ކުރިން ކޮންޓްރަކްޓަރު އެދުނު ގޮތަށް ފައިނޭންސް ކަންކަން ހަމަނުޖެހުމުން ކަމަށެވެ. [caption id="attachment_103132" align="alignnone" width="727"] ކޮންސްޓްރަކްޝަން އެންޑް ޕްލޭނިން މިނިސްޓަރު ޑރ. އަބްދުﷲ މުއްތޮލިބު[/caption] މުއްތޮލިބު ވިދާޅުވީ ސަރުކާރުގެ އުއްމީދަކީ މިއަހަރު ނިމުމުގެ ކުރިން ރަސްމާލެ ހިއްކައި ނިންމުން ކަމަށާއި، އެކަން އެމަގުން ކުރުމަށް ގޮތްތަކެއް ހޯދަމުން އަންނަ ކަމަށެވެ. ރަސްމާލެ ހިއްކުމުގެ މަސައްކަތް މަޑުޖެހިފައި އޮތްނަމަވެސް އެ މަޝްރޫޢުގެ މަސައްކަތް ހުއްޓިފައި ނުވާކަމަށްވެސް މިނިސްޓަރު ފާހަގަކުރެއްވިއެވެ. "ރަސްމާލެ" ހިއްކުމުގެ މަސައްކަތް ކުރަމުން އަންނަނީ ސްރީ ލަންކާގެ ކުންފުންޏެއް ކަމަށްވާ ސިވިލް މެރީން ކޮންސްޓްރަކްޝަން ކޮމްޕެނީ (ސީއެމްސީސީ)ންނެވެ. އެ މަޝްރޫއަށް ދައުލަތުން އެއްވެސް ހަރަދެއް ނުކުރެ އެވެ. އޭގެ ބަދަލުގައި އެ ކުންފުންޏަށް ދެނީ 70 ހެކްޓަރުގެ ބިމެކެވެ. އެއީ ފުށިދިއްގަރުފަޅު ހިއްކައިގެން ލިބޭ 1093 ހެކްޓަރުން ބިމުގެ ތެރެއިން 60 ހެކްޓަރުގެ ބިމަކާއި، ހުޅުމާލެއިން ދިނުމަށް ހަމަޖެހިފައިވާ 10 ހެކްޓަރު ގެ ބިމެވެ.