ބ.އަތޮޅުން ފެށިގެން މ.އަތޮޅަށް މޫސުން ވަރަށް ގޯސްވާނެ: މެޓް އޮފީސް

ކުރިއަށްއޮތް ދެތިން ގަޑިއިރަށް މޫސުން ވަރަށް ގޯސްވާނޭކަމަށް ލަފާކޮށް ބ.އަތޮޅުން ފެށިގެން މ.އަތޮޅަށް އޮރެންޖު އެލާޓް ނެރެފިއެވެ. މޫސުމާ ބެހޭ ޤައުމީ އިދާރާއިން ނެރެފައިވާ އޮރެންޖު އެލާޓްގައި ބުނެފައިވަނީ، މިއަދުގެ 17:30 ހުން ފެށިގެން މިރޭގެ 20:30 ހާ ހަމަޔަށް ބ.އަތޮޅުން ފެށިގެން މ.އަތޮޅަށް މޫސުން ވަރަށް ގޯސްވާނޭކަމަށް ލަފާކުރެވޭ ކަމަށެވެ. އޮރެންޖު އެލާޓް ނެރެފައިވާ ގަޑިތަކުގައި ވައިގެ ބާރުމިން ގަޑިއަކު 36 މޭލާއި 42 މޭލާ ދެމެދުގެ ބާރުމިނުގައި ވައިޖެހޭނޭކަމަށް ލަފާކޮށްފައިވާއިރު، ވިލާގަނޑުގައި ގަޑިއަކު 60 މޭލަށް ވައިގަދަވާނޭކަމަށް މެޓް އޮފީހުން ވަނީ ލަފާކޮށްފައެވެ. މީގެ އިތުރުން ކަނޑުތައް ވަރަށް ގަދަވާނޭކަމަށް ލަފާކުރެވޭ ކަމަށްވެސް މެޓް އޮފީހުން ބުނެއެވެ. ހުަނގު މޫސުމުގެ އެންމެ ގަދަ ދުވަސްކޮޅަށް އަޅާފައިވާއިރު، ގުނަމުން މިދަނީ ހުޅަނގު މޫސުމުގެ ހަތަރުވަނަ ނަކަތް ކަމަށްވާ "ރޯނު" ނަކަތެވެ.