ނަތަންޔާހޫ ހައްޔަރުކުރަން އެދުމުން ރައީސް ޑރ.މުއިއްޒު މަރުޙަބާ ވިދާޅުވެއްޖެ

އިންޓަނޭޝަނަލް ކްރިމިނަލް ކޯޓުގެ ޕްރޮސެކިއުޓަރުން، އިޒްރާއީލްގެ ހައްދުފަހަނައަޅާފައިވާ ބޮޑުވަޒީރު، ބެންޖަމިން ނަތަންޏާހޫ ހައްޔަރުކުރުމުގެ އަމުރަކަށް އެދި ހުށަހެޅުމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެކަމަށް މަރުޙަބާ ވިދާޅުވެއްޖެއެވެ. އިޒްރާއީލުން ފަލަސްތީނުގައި ހިންގަމުންގެންދާ ހަނގުރާމައިގެ ޖަރީމާތައް ބަލައި ތަހުގީގުކުރުމަށްޓަކައި އިޒްރާއީލުގެ ބޮޑުވަޒީރު ނަތަންޏާހޫ ހައްޔަރުކުރުމުގެ އަމުރަކަށް ބައިނަލްއަޤްވާމީ ޖީނާއީ ކޯޓުގެ ޕްރޮސެކިއުޓަރުން އެދި ހުށަހަޅާފައިވާއިރު، ނަތަންޏާހޫގެ ޑިފެންސް މިނިސްޓަރު ޔޯވް ގަލަންޓް ހައްޔަރު ކުރުމުގެ އަމުރަކަށްވެސް ވަނީ އެދިފައެވެ. މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ.މުއިއްޒު ވިދާޅުވީ، މިކަން ވެގެންދާނީ ފަލަސްތީނުގެ ރައްޔިތުންނަށް އަދުލު އިންސާފު ޤާއިމްކުރުމަށް އެޅީގެންދާ މުހިއްމު ފިޔަވަޅަކަށް ކަމަށެވެ. މި ޕޯސްތޤޣާޢީ ރައީސް ވިދާޅުވެފައިވަނީ އިޒްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ އަދި ހިންގާފައިވާ ހަނގުރާމައިގެ ޖަރީމާތައް ބަލަންޖެހޭނޭކަމަށް ވިދާޅުވެފައެވެ. މިގޮތުން ފަލަސްތީނު މައްސަލާގައި ރާއްޖޭން އަބަދުވެސް އެޤައުމާއެކުގައި އޮންނާނޭ ކަމަށާއި ފަލަސްތީނުގެ ދިފާއުގައި ކުރެވެންހުރި ހުރިހާ ކަމެއް ކުރައްވާނޭކަމަށް ރައީސް ވަނީ ވިދާޅުވެފައެވެ. https://x.com/MMuizzu/status/1792553702513152487 އިޒްރާއީލުގެ ބޮޑުވަޒީރު ނަތަންޏާހޫ ހައްޔަރުކުރުމުގެ އަމުރަކަށް ބައިނަލްއަޤްވާމީ ޖީނާއީ ކޯޓުގެ ޕްރޮސެކިއުޓަރުން އެދި ހުށަހެޅި ނަމަވެސް މިކަމުގައި ގޮތެއް ނިންމުމުގެބާރު އޮތީ، އެ ކޯޓުގެ ފަނޑިޔާރުންގެ އަތްމަތީގައެވެ. އިޒްރާއީލު ސިފައިން ފަލަސްތީނުގެ ރައްޔިތުންނަށް އަމާޒުކޮށް ދެމުންގެންދާ ހަމަލާތައް ހުއްޓާލުމަށް ބައިނަލްއަޤްވާމީ ޤައުމުތަކުންނާއި ޖަމިއްޔާ ޖަމާއަތްތަކުން ގޮވާލިނަމަވެސް، އިޒްރާއީލުން ދަނީ ގޮތްދޫނުކޮށް ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އުދުވާންތައް ވަރުގަދަކުރަމުންނެވެ.