އަނެއްކާވެސް މާލޭގެ، ގެއެއްގެ ތެރޭގައި މީހަކު މަރުވެފައި އޮއްވާ ފެނިއްޖެ

މާފަންނު ގެއެއްގެ ތެރޭގައި މަރުވެފައި އޮތް މީހަކު މީގެ ކުޑައިރުކޮޅެއްކުރިން ފެނިއްޖެއެވެ. ފުލުހުން މައުލޫމާތު ދޭގޮތުގައި މ.ރަބީޢުވިލާ ގްރައުންޑް ފްލޯގައި މަރުވެފައި އޮއްވާ ފެނިފައިވަނީ ފިރިހެނެކެވެ. އޭނާ މަރުވެފައި އޮތްކަމުގެ ރިޕޯޓް ފުލުހުންނަށް ލިބިފައިވަނީ މިއަދު މެންދުރު 14:20 އެހާކަން ހާއިރެވެ. ފުލުހުންނަށް ރިޕޯޓް ލިބުމާއެކު ސީނަށް ގޮސްފައިވާއިރު، ފުލުހުން މިހާރު ދަނީ ކާކުކަން ދެނެގަތުމަށް ތަހުލީލުތައް ކުރުމަށް މަސައްކަތް ކުރަމުންނެވެ. މީހަކު މަރުވެފައި އޮއްވައި މިއަދު ފެނުނު ގެއަކީ މިދިޔަ އޭޕްރިލްމަހު އަލިފާނުގެ ހާދިސާއެއްވެސް ހިނގާފައިވާ ގެއެކެވެ. މިނިވަންއަށް މައުލޫމާތު ލިބިފައިވާ ގޮތުގައި އޭރުވެސް އެގެއަކީ މީހުން ދިރިއުޅެމުންދާ ގެއެއް ނޫނެވެ. ނަމަވެސް މަގުމަތިވެފައިވާ ބައެއް މީހުން އެ ގޭގައި އުޅެމުންދާކަމަށް މައުލޫމާތު ލިބެއެވެ. މަރުވެފައިވާ އިތުރު މީހަކު މިއަދު ފެނިފައިވާއިރު، މިމަހގެ 13 ވަނަ ދުވަހު ބަނޑޭރިކޮށިންވެސް ވަނީ މީހަކު މަރުވެފައި އޮއްވައި ފެނިފައެވެ. އެ ތަނަކީވެސް މީހުން ދިރިއުޅެމުންދާ ތަނެއް ނޫނެވެ. ފުލުހުން ވަނީ އެމީހާގެ ޕޯސްޓްމޮޓަމް ހެދުމަށް ނިންމާފައިވާކަން ހާމަކޮށްފައެވެ.