ބ.އަތޮޅުން ފެށިގެން އައްޑޫސިޓީއަށް މޫސުން ވަރަށް ގޯސް

މިއަދުގެ މެންދުރުކުރިން ބ.އަތޮޅުން ފެށިގެން އައްޑޫސިޓީއަށް މޫސުން ވަރަށް ގޯސްވާނޭކަމަށް ލަފާކުރެވޭތީ އެ ސަރަހައްދަށް ޔެލޯ އެލާޓް ނެރެފިއެވެ. މޫސުމާ ބެހޭ ޤައުމީ އިދާރާއިން ބުނެފައިވަނީ މިއަދު ހެނދުނު 10:00 އިން ފެށިގެން މެންދުރު 14:00 އާ ހަމަޔަށް ބ.އަތޮޅުން ފެށިގެން އައްޑޫސިޓީ އާ ހަމަޔަށް މޫސުން ގޯސްވާނޭކަމަށް ލަފާކުރެވޭތީވެ، އެކަމަށް ސަމާލުވުމަށް އެދޭކަމަށެވެ. އާއްމު ގޮތެއްގައި އެ ގަޑިތަކުގައި އެ ސަރަހައްދަށް ގަޑިއަކު 25 މޭލާއި 30 މޭލުގެ ބާރުމިނުގައި ވައިޖެހުނު ނަމަވެސް ވިލާގަނޑުގައި ގަޑިއަކު 50 މޭލަށް ވައިބާރުވެ، ކަނޑުތައް ވަރަށް ގަދަވާނޭކަމަށް ލަފާކުރެވޭކަމަށް މެޓް އޮފީހުން ބުނެއެވެ. ހިނގަމުން މިދަނީ ހުޅަނގު މޫސުމުގެ ދެވަނަ ނަކަތް ކަމަށްވާ "ކެތި" ނަކަތުގެ އެންމެ ފަހު ދުވަސްކޮޅެވެ. "ކެތި" މި ނަކަތަކީ ހުޅަނގު މޫސުމުގެ ވިއްސާރަ ފެށިގެން އަންނަ ނަކަތެވެ. މި ނަކަތުގައި އާއްމުގޮތެއްގައި އުޑުމަތި އޮންނާނީ ބަނަކޮށެވެ. ދޭތެރެ ދޭތެރެއިން ވާރޭ ވެހޭއިރު، މި ނަކަތުގައި 7 ކޮޅިގަނޑު ލައިގަންނާނޭކަމަށް އިހުގެ މީހުންގެ ފަރާތުން ވާހަކަ އައިސްފައި އޮވެއެވެ. ކެތި ނަކަތަށްފަހު ދެން މިހިނގާ މެއިމަހުގެ 20 ވަނަ ދުވަހު ބައްދަލުކުރާނީ "ރޯނު" ނަކަތެވެ. މި މޫސުމުގައި ގަދަވަޔާއެކު ވިއްސާރަކުރާނެއެވެ. މިއީ ދިވެހިންގެތެރޭގައި މަޝްހޫރު ޖޫންޖުލައިގެ ވިއްސާރަ ފެށޭ ނަކަތެވެ. މި ނަކަތުގައި ކަނޑުތައް ވަރަށް ގަދަވާނެއެވެ.