އިންޑިޔާގެ 51 ސިފައިން އަނބުރާ ފޮނުވާލައިފި

ރާއްޖޭގައި ގާއިމްވެގެން ތިބި އިންޑިޔާ ސިފައިންގެ ތެރެއިން މިހާތަނަށް 51 ސިފައިންގެ އަނބުރާ ފޮނުވާލާފައިވާ ކަމަށް ސަރުކާރުން ހާމަކޮށްފިއެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން، އެ އޮފީހުގެ ޗީފް ސްޕޯކްސްޕާސަން، ހީނާ ވަލީދު ވިދާޅުވީ، ރާއްޖޭގައި ތިބި އިންޑިއާ ސިފައިންގެ މީހުންގެ ތެރެއިން ދެ ޕްލެޓްފޯމެއްގައި ތިބި 51 ސިފައިން މިހާރު ފޮނުވާލެވިފައިވާ ކަމަށެވެ. އެހެންނަމަވެސް ރާއްޖޭގައި ގާއިމްވެ ތިބީ ޖުމްލަ ކިތައް ސިފައިން ކަމެއް ހީނާ ވިދާޅެއް ނުވެއެވެ. އަދި މިހާތަނަށް ފޮނުވާ ނުލެވި ތިބި ސިފައިންގެ އަދަދެއް ވެސް ވިދާޅެއް ނުވެއެވެ. ސަރުކާރުން ކުރިން ވެސް ބުނެފައިވާ ގޮތަށް މިމަހުގެ 10 ގެ ކުރިން ހުރިހާ ސިފައިން ފޮނުވާލެވޭނެ ކަމަށް މިއަދު ހީނާ ވިދާޅުވިއެވެ. ރާއްޖޭން ފޭބި އިންޑިއާ ސިފައިންގެ އަދަދު ސަރުކާރުން ހާމަކޮށްފައިވާއިރު، ރާއްޖޭން އިންޑިއާ ސިފައިން ބޭލުމާއި ގުޅޭ ރަސްމީ މަޝްވަރާތައް ސަރުކާރުން ވަނީ މިދިޔަ ޖެނުއަރީ މަހުގެ 14 ވަނަ ދުވަހުން ފެށިގެން ކުރަމުންނެވެ. އެގޮތުން މިހާތަނަށް އޭގެ ހަތަރު ބައްދަލުވުމެއް ވަނީ ބާއްވާފައެވެ.