ޓިކެޓް އަތުލައި، ޖާބިރު އެމްޑީޕީން ވަކިކޮށްފި

ރައްޔިތުން މަޖިލީހުގެ ކ.ކާށިދޫ ދާއިރާ ތަމްސީލް ކުރައްވަމުން ގެންދަވާ އަދި އެމްޑީޕީގެ ޕްރައިމަރީގައި އެދާއިރާގެ ގޮނޑި ކާމިޔާބުކުރެއްވި އަބުދުﷲ ޖާބިރުގެ ކެނޑިޑެސީ ބާތިލްކޮށް ޕާޓީންވެސް ވަކިކޮށްފިއެވެ. އެމްޑީޕީން ނެރުނު ބަޔާނެއްގައި ބުނެފައިވަނީ ޖާބިރު ޕާޓީން ވަކިކޮށްފައިވަނީ އާއްމު އިޖުތިމާއީ މިންގަނޑުން ބޭރުން ކަންކަން ކުރުމާއި މަސްލަހަތު ގެއްލޭގޮތަށް އޭނާގެ އަމަލުތައް ހުންނާތީ ކަމަށެވެ. "މުޖުތަމައުގެ އާއްމު މިންގަނޑާ ޚިލާފަށް ރައްޔިތުންނާއި ބޭއަދަބީ ބަހުރުވައިން މުޢާމަލާތްކޮށް މަސްލަހަތު ގެއްލޭގޮތަށް ތަކުރާރުކޮށް އަމަލުކުރަމުންދާތީ، މި ކަމަކީ މި ޕާޓީއާއި ޕާޓީގެ އާންމު މެންބަރުންގެ މަސްލަޙަތަށް އުނިކަންލިބޭ ފަދަ ޢަމަލެއްކަމުގައިވާތީ މިޕާޓީގެ ފިޔަވަޅުއަޅާ ކޮމިޓީއަށް ހުށައެޅިފައިވާ މައްސަލަ ބެލުމަށްފަހު އަބްދުﷲ ޖާބިރު 20 ވަަނަ ރައްޔިތުންގެ މަޖިލިސްގެ އިންތިޚާބުގައި މިޕާޓީގެ ފަރާތުން ވާދަކުރުމުގެ ފުރުޞަތު ނުދިނުމަށާއި، އަދި މިއަދުން ފެށިގެން ޕާޓީގެ މެންބަރުކަމުން ވަކިކުރުމަށް މި ޕާޓީގެ ފިޔަވަޅުއަޅާ ކޮމެޓީން ވަނީ ނިންމާފަ" އެމްޑީޕީގެ ބަޔާނުގައި ބުންޏެވެ https://twitter.com/MDPSecretariat/status/1754516124304367693 މި ބަޔާނުގައި ބުނެފައިވަނީ، ހ.ތިމާވެށި އަބްދުﷲ ޖާބިރު އެމްޑީޕީއާ އަލުން ގުޅުމަށް އެދުނުކަމުގައިވީނަމަވެސް އެފުރުސަތު ލިބޭނީ ޕާޓީގެ ޤައުމީ މަޖިލިހަށް ހުށައަޅައި އެމަޖިލިހުން ނިންމަވާގޮތެއްގެ މަތިންކަމަށެވެ. ޖާބިރު އަލުން ޕާޓީއާ ގުޅިވަޑައިގަތް ނަމަވެސް ކުރިއަށްއޮތް 5 އަހަރުދުވަހުގެ ތެރޭގައި ޕްރައިމަރީއެއްގައި ވާދަކުރުމުގެ ފުރުސަތު ނުލިބޭނެ ކަމަށްވެސް އެމްޑީޕީގެ ފިޔަވަޅުއަޅާ ކޮމެޓީން ވަނީ ނިންމާފައެވެ. ޖާބިރު އެންމެފަހުން އެމްޑީޕީއާ ގުޅިވަޑައިގެންނެވީ މިދިޔަ އަހަރުގެ ޖޫންމަހުގެ ތެރޭގައެވެ. އެމްޑީޕީން ޖާބިރުއާ މެދު ފިޔަވަޅު އަޅާފައިވާއިރު، އޭނާ ވަނީ މިއަދު މިއަދު ބޭއްވި ރިޔާސީބަޔާން އިއްވުމުގެ ޖަލްސާ އެމްޑީޕީން ބޮއިކޮޓް ކޮށްފައިވަނިކޮށް ޖަލްސާގައި ބައިވެރިވެ ވަޑައިގެންފައެވެ.