ތިން ރަށެއްގެ ބައި-އިލެކްޝަންގެ ވޯޓުލުން މިއަދު ކުރިއަށްދަނީ

ތިން ރަށެއްގެ ބައި-އިލެކްޝަންތަކުގެ ވޯޓުލުން މިއަދު ފަށައިފިއެވެ. މި ބައި-އިލެކްޝަންތަކުގައި ވޯޓުލަނީ ފ. އަތޮޅު ކައުންސިލް ރައީސްގެ ގޮނޑި އާއި ވ. ފެލިދޫ ކައުންސިލް ރައީސްގެ ގޮނޑިއަށް މެންބަރަކު އިންތިހާބު ކުރުމަށާއި  ރ. ރަސްގެތީމުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީން ހުސްވެފައިވާ ގޮނޑިއަށް މެންބަރަކު އިންތިހާބުކުރުމަށެވެ. މި ބައި-އިލެކްޝަންތަކުގެ ވޯޓުލުން މާލެ އާއިއެކު، ޖުމްލަ 8 ރަށެއްގައި ކުރިއަށްދާނެކަމަށް އިލެކްޝަންސް ކޮމިޝަނުން ވަނީ ބުނެފައެެވެ. އެ ކޮމިޝަނުން ބުނި ގޮތުގައި ޖުމްލަ 11 ވޯޓު ފޮށި މި ބައި-އިލެކްޝަންތަކުގައި ބަހައްޓާނެއެވެ. އެގޮތުން، މާލޭގައި ބަހައްޓާ 3 ފޮށިވެސް ހުންނާނީ ދަރުމަވަންތަ ސްކޫލްގެ އާ އިމާރާތުގައެވެ. 3 ބައި-އިލެކްޝަންގެ ވޯޓުލުންވެސް މި ފޮށިތަކުގައި ކުރިއަށް ދާނެއެވެ. މީގެ އިތުރުން، ފ. ފީއަލި، ފ. ބިލެތްދޫ، ފ. މަގޫދޫ، ފ. ދަރަނބޫދޫގައި އަދި ފ. ނިލަންދޫގައި ވޯޓު ފޮށި ހުންނާނެކަމަށް އިލެކްޝަންސްއިން ބުނެޏެވެ. މި ފޮށިތަކުގައި ކުރިއަށްދާނީ ފ އަތޮޅު ކައުންސިލް ރައީސްގެ ބައި-އިލެކްޝަނެވެ. ވ. ފެލިދޫ އާއި ރ. ރަސްގެތީމު ބައި-އިލެކްޝަންގެ ވޯޓު ފޮށިތައް އެ ރަށްރަށުގައި ބަހައްޓާފައި ހުންނާނެކަމަށްވެސް ކޮމިޝަނުން ބުންޏެވެ. މި ބައި-އިލެކްޝަންތަކުގެ ވޯޓުލުން ކުރިއަށްދާނީ މިއަދު ހެނދުނު 8އިން ހަވީރު 4އަށެވެ. މި ބައި-އިލެކްޝަންގައި ވޯޓުލުމަށް ޝަރުތު ހަމަވާ، 5574 މީހުން އެބަތިއްބެވެ.