"ދަ ސަމަރ އައި ޓަރންޑް ޕްރިޓީ" ގެ ސީޒަން 2 ޖުލައި މަހު

އެމެރިކާގެ ޓީނޭޖް ރޮމޭންޓިކް ޑްރާމާ ސީރީޒް އެއް ކަމަށްވާ "ދަ ސަމަރ އައި ޓަރންޑް ޕްރިޓީ" ގެ ދެވަނަ ސީޒަން އަންނަ ޖުލައި މަހުގެ 14 ވަނަ ދުވަހު ޕްރިމިއާ ކުރަން ތައްޔާރުވަމުން އަންނަ ކަމަށް ރިޕޯޓްތައް ބުނެފިއެވެ. އެގޮތުން އިއްޔެ ވަނީ އެ ސިރީޒްގެ ދެވަނަ ބައިގެ ފުރަތަމަ ސީކުއަލް ފޭނުންނާ ހިއްސާކޮށްފައެވެ. ލޯލާ ޓަންގް، ކްރިސްޓޮފަރ ބްރައިނީ އަދި ގެވިން ކަސަލެގްނޯ ލީޑް ރޯލުން ފެނިގެންދާ އެ ސީރީޒްގެ ފަސްޓް ލޫކް އިމޭޖްތަކުގައި ފެނިގެންގޮސްފައިވަނީ އެމީހުންގެ ޓީން ކެރެކްޓަރު އިޒާބެލް "ބެލީ" ކޮންކްލިން، ކޮންރަޑް ފިޝާ އަދި ޖެރެމިއާ ފިޝާ އެވެ. އޭގެ އިތުރުން އެކްސްކްލޫސިވް ތަސްވީރުތަކުގައި ޝޯން ކައުފްމަން، ރެއިން ސްޕެންސަރ، އަދި ކައިރާ ސެޑްގްވިކް ފަދަ އެހެން ކާސްޓުން ވެސް ފެނިގެންގޮސްފައި ވެއެވެ. ޓީނޭޖް ލަވް ޓްރައިއެންގަލް ސީރީޒަކީ ޖެނީ ހާންގެ ދަ ސަމަރ އައި ޓަރންޑް ޕްރިޓީ ނޮވެލް ޓްރިލޮޖީގެ ލައިވް އެކްޝަން އެޑެޕްޓޭޝަނެކެވެ. ދަ ސަމަރ އައި ޓަރންޑް ޕްރިޓީ 2 އަކީ މި ފޮތުގެ ސިލްސިލާގެ ދެވަނަ ނޮވެލްގެ މައްޗަށް ބިނާކޮށް އުފައްދާފައިވާ ފިލްމެއް ކަމަށް މައުލޫމާތު ލިބެއެވެ. އަންނަ ޖުލައި މަހު ޕްރިމިއާ ކުރަން ހަމަޖެހިފައިވާ "ދަ ސަމަރ އައި ޓަރންޑް ޕްރިޓީ 2" ބެލުންތެރިންނަށް ފެންނާނީ ޕްރައިމް ވީޑިއޯ އިންނެވެ. ރިޕޯޓްތައް ބުނާ ގޮތުން ޕްރިމިއާ ކުރާ ދުވަހު އާ ތިން އެޕިސޯޑު ނެރޭނެއެވެ. އެއަށްފަހު ފައިނަލާ ހަމައަށް ކޮންމެ ހަފްތާއަކު އެއް އެޕިސޯޑު ނެރެން ވަނީ ހަމަޖެހިފައެވެ. ހަމައެއާއެކު ފުރަތަމަ ސީޒަނުގައި ހަތް އެޕިސޯޑް ހިމެނުނުއިރު، ސީޒަން ދޭއްގައި އަށް އެޕިސޯޑް ހުންނާނެ ކަމަށް މައުލޫމާތު ލިބެއެވެ.