ރާއްޖޭގެ މާސްޓަރޕްލޭން ހެދުމުގެ މަސައްކަތް ކުރިއަށް ގެންދާނީ ރައްޔިތުންގެ ބައިވެރިވުމާއެކުކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ ރ. އަތޮޅުގެ 11 ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ހަވީރު ރ. އަނގޮޅިތީމަށް ވަޑައިގެން ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވި ގޮތުގައި ޤާނޫނީީ ބާރުވެރިކަން ދީގެން ރައްޔިތުން ނިންމި ގޮތަށް ތަރައްޤީގެ ކަންކަން ކުރިއަށް ދާނެ ކަމަށާއި ތަރައްޤީ ކުރިއަށް ގެންދާނީ ރައްޔިތުން ބޭނުންވާ މިސްރާބަށެވެ.
އެކަމުގައި ރައްޔިތުންގެ އެއްބާރުލުން ދެއްވުމަށް ރައީސް އެދިވަޑައިގަތެވެ. އެމަނިކުފާނު ބޭނުން ފުޅުވަނީ ސީދާ ރައްޔިތުން އެދޭ ގޮތް އޮޅުން ފިލުއްވައިގެން ކުރިއަށް ވަޑައިގަތުމަށް ކަމަށް ވެސް އެމަނިކުފާނު ވިދާޅުވިއެވެ.
