ސްޓެލްކޯއިން ފެނަކައަށް ފަންނީ އެހީތެރިކަން ދިނުމުގެ އެއްބަސްވުމެއްގައި ސޮއިކޮށްފި

މާލޭގެ ކަރްނަޓުގެ ހިދުމަތްދޭ ކުންފުނި ކަމަށްވާ ސްޓެލްކޯއިން، ފެނަކަ އަށް، ފަންނީ އެހީތެރިކަން ދިނުމުގެ އެއްބަސްވުމެއްގައި މިއަދު ސޮއިކޮށްފިއެވެ. އެ އެއްބަސްވުމުގައި ސޮއިކުރެއްވީ ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އާއި ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދެވެ. މި އެއްބަސްވުމުގެ ދަށުން ސްޓެލްކޯއިން ވަނީ ފެނަކައިގެ މުވައްޒަފުންނަށް ބޭނުންވާ ފަންނީ ތަމްރީނާއި ފަންނީ ގޮތުން އެހެނިހެން އެހީތެރިކަން ދިނުމަށް ނިންމާފައެވެ. މިކަމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯގެ އެމްޑީ ފަހުމީ ވިދާޅުވީ އެ އެއްބަސްވުމުގެ ދަށުން ފެނަކައިގެ މުވައްޒަފުންނަށް ބޭނުންވާ މެކޭނިކަލް އަދި އިންޖިނިއަރިންގެ ތަމްރީނުތައް ދޭނެ ކަމަށެވެ.

ފެނަކައިގެ މުވައްޒަފުންނަށް ބޭނުންވާ ތަމްރީނާއި ސަޕޯޓު ދޭނީ ހިލޭ ފަހުމީ ވިދާޅުވިއެވެ.

އަދި ފެނަކައިގެ އެމްޑީ މުއާޒު ވިދާޅުވީ، އެ ކުންފުނިން މިހާރު އެންމެ ބޮޑު ހޭދައެއް ކުރަނީ ޕަމްޕާއި ޖަނެރެޓަރުތައް ސާވިސް ކުރުމަށް ކަމަށާއި މި ދިޔަ އަހަރު އެކަނި ވެސް 117 މިލިއަން ރުފިޔާ އެ ކަމަށް ހޭދަކުރި ކަމަށެވެ. އެގޮތުން، ރަށްރަށަށް ކަރަންޓުގެ ހިދުމަތްދޭ ސަރުކާރުގެ ކުންފުނި ފެނަކައަށް، މިކަމުގެ ސަބަބުން މިހާރު އޮތް މާލީ ދަތިކަމުގެ ހާލަތުން އަރައިގަތުމަށް ވަރަށް ބޮޑަށް އެހީވާނެ ކަމަށާއި ސާވިސް ކުރުމުގެ ހިދުމަތް ސްޓެލްކޯގެ އެހީގައި ހިލޭ ލިބިގެން ދިއުމަކީ އެ ކުންފުނިންދޭ ހިދުމަތްތައް ފުރިހަމައަށް ފޯރުކޮށްދިނުމަށް މަގުފަހިވާނެ ކަމެއް ކަމަށް ވެސް މުއާޒު ވިދާޅުވިއެވެ. ސަރުކާރުގެ މި ދެކުންފުނިން މިއަދު ސޮއިކުރި މި އެއްބަސްވުމަކީ ފެނަކައިންދޭ އެހީ، އިތުރަށް ފުރިހަމައަށް ސިސްޓެމެޓިކް ކޮށް ފޯރުކޮށްދިނުމަށް ވި އެއްބަސްވުމެކެވެ.