ސްކޫލް ދަރިވަރުންނަށް ނަފްސާނީ އެހީތެރިކަން ފޯރުކޮށްދިނުމަށް ހެލްޕްލައިނެއް ގާއިމްކޮށްފި

ރާއްޖޭގެ ސްކޫލް މަދަރުސާތަކުގެ ދަރިވަރުންނަށް ނަފްސާނީ އެހީތެރިކަން ފޯރުކޮށްދިނުމަށް "ހެލްޕްލައިން 1484" އެއް ގާއިމްކޮށްފިއެވެ. މި ހެލްޕްލައިން އިފްތިތާހްކޮށް ދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދު އެވެ. އެ ރަސްމިއްޔާތު އޮތީ މިއަދު ހެނދުނު ހ. މީރުމާގައެވެ. ރައީސްގެ އަނބިކަނބަލުން މިއަދު އިފްތިތާހްކޮށްދެއްވި މި ހެލްޕްލައިން 1484 ގާއިމްކޮށްފައިވަނީ، މިނިސްޓްރީ އޮފް އެޑިޔުކޭޝަނުން އިސްނަގައިގެން، ޔުނިސެފާއި، ޑަބްލިޔު.އެޗް.އޯ ގެ އެހީތެރިކަމާއި އެކުގައެވެ. މިހެލްޕްލައިންގައި މަސައްކަތްކުރައްވާ ކައުބްސިލަރުން ތަމްރީން ކުރުމާއި ހެލްޕްލައިން ހިދުމަތް ފޯރުކޮށްދޭނެ އުސޫލުތައް އެކުލަވާލުމުގައި ދިވެހި ރެޑްކްރެސެންޓުން ވަނީ ފަންނީ އެހީތެރިކަން ފޯރުކޮށްދީފައެވެ. ދަރިވަރުންނަށް ނަފްސާނީ ފުރަތަމަ އެހީ ފޯރުކޮށް ދިނުމަށް ގާއިމްކުރި މިހެލްޕްލައިން 1484 ގެ ހިދުމަތް ހުކުރު ދުވަސްފިޔަވައި ކޮންމެ ދުވަހަކު ވެސް ލިބޭނެއެވެ. މިހެލްޕްލައިންގެ ހިދުމަތްފެށުމަށް ހަމަޖެހިފައިވަނީ މިހިނގާ ޖޫންމަހުގެ 18 ވަނަ ދުވަހުން ފެށިގެންނެވެ. ސްކޫލް މަދަރުސާތަކުގެ ދަރިވަރުންނަށް މި ހެލްޕްލައިން މެދުވެރިކޮށް ނަފްސާނީ ފުރަތަމަ އެހީ ފޯރުކޮށްދެއްވުމުގެ މަސައްކަތް ކުރައްވާނީ އެކަމަށްޓަކައި ހާއްސަކޮށް ތަމްރީން ދެއްވާފައިވާ ސްކޫލްތަކުގައި މިހާރު ތިއްްބެވި ކައުންސިލަރުންނެވެ. މި ހެލްޕްލައިނުން ރާއްޖޭގެ ހުރިހާ ކަންކޮޅެއްގައި ތިބި ސްކޫލް މަދަރުސާތަކުގެ ދަރިވަރުންނަށް ހިދުމަތް ހޯދޭނެއެވެ.