ސައުދީން ރާއްޖެއަށް 55 ޓަނުގެ ކަދުރު ހަދިޔާކޮށްފި

ސައުދީ ސަރުކާރުން ރާއްޖެއަށް 55 ޓަނުގެ ކަދުރު މިއަދު ހަދިޔާކޮށްފިއެވެ. މިކަމާއި ގުޅޭގޮތުން އިސްލާމިކް މިނިސްޓްރީން އެކްސްގައި ބުނެފައިވަނީ ސައުދީ ސަރުކާރުން ހަދިޔާކުރި 50 ޓަނުގެ ކަދުރު ހަވާލުކުރި އެއްބަސްވުމުގައި މިއަދު ސޮއިކޮށްފައިވާކަމަށެވެ. ސައުދީ ސަރުކާރުން ރާއްޖެއަށް ހަދިޔާކުރި ކަދުރާ ހަވާލުވުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިސްލާމިކް މިނިސްޓަރު މުހައްމަދު ޝަހީމް އަލީ ސައީދެވެ. ސައުދީގެ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ރާއްޖޭގައި ހުންނަ އެގައުމުގެ ސަފީރު މަތްރިކް އައްދަޢުސަރީއެވެ. އެއްބަސްވުމުގައި ސޮއިކުރުމުގެ ރަސްމިއްޔާތު ކުރިއަށްގެންގޮސްފައިވަނީ، ރާއްޖޭގައި ހުންނަ ސައުދީ އެމްބަސީގައެވެ. https://twitter.com/MVIaffairs/status/1770822912334840063 ސައުދީ ސަރުކާރުން ރާއްޖެއަށް މިފަހަރު ހަދިޔާކުރި 55 ޓަނުގެ ކަދުރުގެ ތެރޭގައި ހިމެނެނީ ސައުދީ ސަރުކާރުގެ ފަރާތުން ހަދިޔާކުރެއްވި 50 ޓަނުގެ ކަދުރާއި، އެގައުމުގެ އިސްލާމީ ވުޒާރާގެ ފަރާތުން ހަދިޔާކުރި 5 ޓަނު ކަދުރެވެ. ސައުދީ އަރަބިއްޔާއާއި ދިވެހިންނާ އޮންނަ ގާތްގުޅުމުގެ ތެރެއިން ކޮންމެ އަހަރަކުވެސް ރާއްޖެއަށް ހަދިޔާކުރައްވާ ކަދުރު މިއަހަރުވެސް ދެއްވާފައިވަނީ ރަސްގެފާނުގެ ފަރާތްޕުޅުންނެވެ. ސައުދީން ވަނީ ރާއްޖެއަށް މިދިޔަ އަހަރުވެސް 50 ޓަނުގެ ކަދުރު ހަދިޔާކޮށްފައެވެ.