ސައުދީން ހަދިޔާކުރި ކަދުރު ބަހަން މިއަދު ފަށަނީ

ސައުދި އަރަބިއްޔާގެ ސަރުކާރުން ރާއްޖެއަށް ހަދިޔާކޮށްފައިވާ ކަދުރު މިއަދުން ފެށިގެން ބަހަން އިސްލާމިކް މިނިސްޓްރީން ނިންމައިފިއެވެ. ސައުދީން ރާއްޖެއަށް 55 ޓަނުގެ ކަދުރު ހަދިޔާކުރުމުގެ އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 21 ވަނަ ދުވަހުގައެވެ. އެގޮތުން، އިސްލާމިކް މިނިސްޓްރީން ބުނީ ދިވެހި ރައްޔިތުންނަށް ސައުދީ އަރަބިއްޔާއިން ހަދިޔާކުރި ކަދުރު ބަހާނީ ހަ ދުވަހެއްގައި ކަމަށެވެ. ކަދުރު ބަހާނެ ދުވަސްތަކާއި ގަޑިތައް:

• އޭޕްރީލް 8-9 އަށް، މެންދުރު 1 އިން 3 އަށް

• އޭޕްރީލް 14-18 އަށް، މެންދުރު 1 އިން 3 އަށް

• އޭޕްރީލް 23-25 އަށް، ހެނދުނު 9:30 އިން މެންދުރު 12 އަށް

މާލެ އާއި ވިލިމާލެ އަދި ހުޅުމާލޭގައި އުޅޭ މީހުންނަށް ކަދުރު ބަހާނީ އިސްލާމިކް މިނިސްޓްރީން ކަމަށްވާއިރު، ކޮންމެ ގޭބިސީއަކަށް ވެސް އެއް ޕެކެޓް ކަދުރު ދޭން ވަނީ ނިންމާފައެވެ. ކަދުރު ބަލައި ދާއިރު އައިޑީކާޑު ގެންދަން ޖެހެއެވެ. ރަށް ރަށުގައި ކަދުރު ބަހަން ހަމަޖެހިފައިވަނީ ކައުންސިލްތަކާ ހަވާލުކޮށްގެން ކަމަށް މިނިސްޓްރީން ބުނެފައިވެއެވެ. https://twitter.com/MVIaffairs/status/1777050630814896637 ކޮންމެ އަހަރެއްގެ ރަމަޟާން މަހާއި ދިމާކޮށް ސައުދީ ސަރުކާރުން ރާއްޖެއަށް ކަދުރު ހަދިޔާ ކުރަމުންދާއިރު، ފާއިތުވި ދެއަހަރު ވެސް ސައުދީން ވަނީ 50 ޓަނުގެ ކަދުރު ރާއްޖެއަށް ހަދިޔާކޮށްފައެވެ.