ސައުދީގައި ކިޔަވަން ތިބޭ ދިވެހިންނަށް ހާޖީންނަށް އެހީތެރިވުމާއެކު ހައްޖުވުމުގެ ހުއްދަ ސައުދީން ދީފި

ސައުދީގައި ކިޔަވަމުންދާ ދިވެހި ދަރިވަރުންނަށް ދިވެހި ހައްޖާޖީންނަށް އެހީތެރިވުމާއެކު ހައްޖުވުމުގެ ފުރުސަތު އެ ގައުމުގެ ސަަރުކާރުން ދެއްވާފައިވާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފިއެވެ. އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވަނީ މިދިޔަ މަހުގެ 10 ވަނަ ދުވަހު ސައުދީގެ ހައްޖު އެންޑް އުމްރާ މިނިސްޓަރު ޑރ. ތައުފީގު ބިން ފައުޒާން އައްރަބީއާއާ ބައްދަލުކުރައްވައި ސައުދީގައި ކިޔަވަން ތިބޭ ދަރިވަރުން ހައްޖު މޫސުމުގައި ހައްޖާޖީންނަށް އެހީތެރިވުމަށް އައުމަށް ރަސްމީކޮށް ހުއްދަ ދެއްވުމަށް އެދިވަޑައިގެންފިއެވެ. އަދި މިއަދު ޝަހީމް "އެކްސް" ގައި ކުރެއްވި ފޯސްޓެއްގައި ވަނީ މިހާރު މި ހުއްދަ ދިވެހި ދަރިވަރުންނަށް ލިބިފައިވާކަން ހާމަކުރައްވާފައެވެ. ""މިފުރުސަތުގައި ސައޫދީ އަރަބިއްޔާގެ ހައްޖު މިނިސްޓަރ ޑރ ތައުފީގަށާއި ހައްޖާއި އުމްރާ އާ ގުޅޭ ސައޫދީގެ އިދާރާތަކާއި ރާއްޖޭގައި ހުންނަ ސައުދީ އެމްބަސީއަށް ނުހަނު އިހުލާސްތެރިކަމާއެކު ޝުކުރު ދަންނަވަން." ޝަހީމް ވިދާޅުވިއެވެ. https://twitter.com/Mohamedshaheem1/status/1755104055586599154 ޝަހީމް އިތުރަށް ވިދާޅުވީ، ރާއްޖޭގެ ހައްޖުވެރިންނަށް އެހީތެރިކަން ދިނުމަށްޓަކައި ކޮންމެ އަހަރަކުވެސް ސައުދީގައި ކިޔަވަން ތިބޭ ދަރިވަރުންނަށް ހައްޖުގައި ބައިވެރިވެވޭ ގޮތަށް ރަސްމީކޮށް ހުއްދަ ދެއްވާފައިވާ ކަމަށެވެ. އެގޮތުން، މިކަމުގެ ސަބަބުން ހައްޖުވެރިންނަށް ލުއިފަސޭހަތަކެއް ލިބިގެންދާނެ ކަމަށާއި، މިއީ ކޮންމެ ކޮންމެ ގައުމަކަށް އެގޮތަށް ފަހިވެފައި އޮންނަ ފުރުސަތެއް ނޫން ކަމަށް ވެސް މިނިސްޓަރ ވިދާޅުވެފައިވެއެވެ.