ރޯދަމަހުގެ ފުރަތަމަ 10 ދުވަހު ފިތުރު ޒަކާތަށް 1.3 މިލިއަން ރުފިޔާ ދައްކައިފި

މިއަހަރުގެ ރޯދަމަހުގެ ފުރަތަމަ 10 ދުވަހުގެ ތެރޭގައި ފިތުރު ޒަކާތުގެ ގޮތުގައި 1.3 މިލިއަނަށްވުރެ ގިނަ ރުފިޔާ ލިބިފައިވާ ކަމަށް އިސްލާމިކް މިނިސްޓްރީން ބުނެފިއެވެ. އިސްލާމިކް މިނިސްޓްރީން މިއަދު ނެރުނު ތަފާސް ހިސާބުތަކުން ދައްކާ ގޮތުގައި ފިތުރު ޒަކާތުގެ ގޮތުގައި ލިބިފައިވާ އެ އަދަދަކީ މިދިޔަ އަހަރު އެ މުއްދަތުގައި ލިބުނު އަދަދަށްވުރެ ތިން ލައްކަ ރުފިޔާ އިތުރު އަދަދެކެވެ.  މިދިޔަ އަހަރުގެ ރޯދަމަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި ލިބުނީ 1.09މިލިޔަން ރުފިޔާއެވެ. އިސްލާމިކް މިނިސްޓްރީންގެ ތަފާސް ހިސާބުތައް ދައްކާ ގޮތުން މިދިޔަ ހަތަރު އަހަރުގެ ތެރޭގައި ރޯދަ މަހުގެ ފުރަތަމަ 10 ދުވަހުގެ ތެރޭގައި ފިތުރު ޒަކާތުގެ ގޮތުގައި ފައިސާ ދެއްކި އަދަދު އަދަދު އެންމެ ދަނީ 1442 ވަނަ އަހަރެވެ. މީލާދީ ގޮތުން އެއީ 2020 ވަނަ އަހަރު ކަމަށް ވާއިރު އެއީ ކޮވިޑް-19 އާ ގުޅިގެން ރާއްޖެއަށް އިގުތިސާދީ ގޮތުން ބޮޑު ކާރިސާއެއް ދިމާވެފައި އޮތް ވަގުތެކެވެ.  އެ އަހަރު ރޯދަމަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި ލިބިފައިވަނީ ނުވަ ލައްކަ ރުފިޔާ އެވެ. . އޭގެ ކުރީ އަހަރުގެ ރޯދަމަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި 1.5 މިލިއަން ލިބިފައިވާ ކަމަށް ތަފާސް ހިސާބުތަކުން ދައްކަ އެވެ. ރޯދަ މަހުގެ 29 ވަނަ ދުވަހާ ހަމައަށް ފިތުރު ޒަކާތް ބަލައިގަންނާނީ ދިރާގުގެ ދިރާގު ޕޭއާއި، އެސްއެމްއެސްއާއި، އުރީދޫގެ އެމްފައިސާއާއި، އެސްއެމްއެސާއި، މޯލްޑިވްސް އިސްލާމިކް ބޭންކްގެ ފައިސާ މޮބައިލްއާއި، ބޭންކް އޮފް މޯލްޑިވްސް ޕޯޓަލް އަދި ފަހި ޕޭ މެދުވެރިކޮށެވެ. އަދި ބަނޑޭރި ޕޯޓަލް މެދުވެރިކޮށް ރޯދަމަހުގެ އެންމެ ފަހު ދުވަހާ ހަމައަށް ފިތުރު ޒަކާތް ދެއްކޭނެއެވެ.