ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ކުންފުނީގެ މުވައްޒަފުންނަށް ޚާއްޞަކޮށްގެން ރޯދައާ ގުޅޭ މުހިންމު މަޢުލޫމާތު ފޯރުކޮށްދިނުމަށ ޚާއްޞަ މަޢުލޫމާތު ސެޝަނެއް ބާއްވައިފިއެވެ.
ސްޓެލްކޯއިން ބުނީ "ރޯދަމަހަށް ފަރުވާތެރިވުން" ގެ ނަމުގައި ބޭއްވި މި ސެޝަނަކީ އެ ކުންފުންޏާއި އިސްލާމިކް މިނިސްޓްރީއާ ގުޅިގެން ބޭއްވި ސެޝަނެއް ކަމަށެވެ.
މި ސެޝަން ބޭއްވުނީ ކުރިއަށް އޮތް ރަމަޟާން މަހަށް މުވައްޒަފުން ތައްޔާރުކުރުމަށާއި، އިސްލާމްދީނާ މެދު ލޯބި އިތުރުކޮށް، ނަމާދާއި ރޯދައާ ގުޅޭ މުހިންމު މަޢުލޫމާތު ފޯރުކޮށްދިނުމުގެ މަޤްޞަދުގައިކަމަށް އެ ކުންފުނިން ބުންޏެވެ.
މި ސެޝަންގައި ބައިވެރިވި ސްޓެލްކޯގެ މުވައްޒަފުންނަށް ރޯދައާއި ނަމާދާ ގުޅުންހުރި އަގުހުރި ގިނަ މަޢުލޫމާތުތަކެއް ވަނީ ފޯރުކޮށްދީފައެވެ.
މި ސެޝަންގައި ރޯދަ މަހުގެ މުހިންމުކަމާއި، ރޯދައިގެ ޙިކުމަތްތަކާއި، ރޯދަ ހިފުމުގެ ޞައްޙަ ގޮތްތަކާއި، ނަމާދުގެ މުހިންމުކަމާ ބެހޭ ގޮތުން މަޢުލޫމާތުދީ، ބައިވެރިންގެ ފަރާތުން ކުރި ސުވާލުތަކަށް ޖަވާބު ދިނުން ކުރިއަށް ގެންގޮސްފައިވެއެވެ.
