ރެސިޕީ: ބަޓަރ ޗިކަން ޕާސްތާ

ބަޓަރ ޗިކަން ޕާސްތާ އަކީ ތައްޔާރުކޮށްލަން ފަސޭހަ، މީރު ކެއުމެކެވެ. އަދި މިއީ އިންޑިއާ އާއި އިޓަލީގެ ކޮންބިނޭޝަން އެކެވެ. ބޭނުންވާތަކެތި:   ކުކުޅު މެރިނޭޓް ކުރުމަށް ބޭނުންވާތަކެތި:

• 1 މޭޒުމަތީ ސަމްސާ ޕްލެއިން ޔޯގަޓް
• 2 މޭޒުމަތީ ސަމްސާ އޮލިވް އޮއިލް
• 1 މޭޒުމަތީ ސަމްސާ ލޮނުމެދު އަދި އިނގުރު ޕޭސްޓް
• 1 ސައި ސަމްސާ ލޮނު/ ޗިލީ ޕައުޑާ/ ރީނދޫ/ ކިއުމިން ޕައުޑާ/ ގަރަމް މަސާލާ
• 250 ގްރާމް ކުކުޅު
• 1 ކިއުބް ބަޓާ

ޕާސްތާ ސޯސްއަށް ބޭނުންވާތަކެތި:

• ޕާސްތާ
• 1 މޭޒުމަތީ ސަމްސާ އޮލިވް އޮއިލް/ 2 ކިއުބް ބަޓާ
• 1 ފިޔާ
• 3 ލޮނުމެދު
• 1 ސައި ސަމްސާ ޕެޕްރިކާ/ ޗިލީ ޕައުޑާ/ ގަރަމް މަސާލާ/ ކިއުމިން ޕައުޑާ/ ހަކުރު
• 2 މޭޒުމަތީ ސަމްސާ ޓޮމާޓޯ ޕޭސްޓް
• 2 ޖޯޑު ޕާސްތާ ފެން
• 3/4 ޖޯޑު ހެވީ ކްރީމް
• 4-5 ކިއުބް ބަޓާ

ތައްޔާރުކުރާނެ ގޮތް

1. ބަޓާ ޗިކެން ޕާސްތާ ތައްޔާރުކުރުމަށް ފުރަތަމަ ކުކުޅުކޮޅު މެރިނޭޓް ކޮށްލާނީއެވެ. އެގޮތުން، ތައްޓަކަށް ޔޯގަޓާއި އޮލިވް އޮއިލްއާއި ލޮނުމެދު އަދި އިނގުރު ޕޭސްޓާއި ލޮނު/ ޗިލީ ޕައުޑާ/ ރީނދޫ/ ކިއުމިން ޕައުޑާ/ ގަރަމް މަސާލާ އެޅުމަށްފަހު ރަނގަޅަށް އެއްކޮށްލާށެވެ. އެއަށްފަހު އޭގެ ތެރެއަށް ކުކުޅުކޮޅު އަޅާލުމަށްފަހު ސޯސްއާއި ރަނގަޅަށް އެއްކޮށްލައި މަތި ޖަހާލުމަށްފަހު މަދުވެގެން 2 ގަޑިއިރު ވަންދެން ބަހައްޓާށެވެ.
2. ކުކުޅު ރަނގަޅަށް މެރިނޭޓް ވުމުން އޮލިވް އޮއިލް އާއި ބަޓާކޮޅަކާއި އެކު ކުކުޅު ރަނގަޅަށް ރޯފިލުވާލާނީއެވެ. އެއަށްފަހު މަތި ޖެހި ތައްޓަކަށް އަޅައި ބަހައްޓާނީއެވެ.
3. ދެން ފެން ހޫނު ކޮށް ލޮނު ކޮޅަކާއިއެކު ފާސްތާ މަޑުކުރަން އުދާނީއެވެ.
4. އެއަށްފަހު ފާސްތާގެ ސޯސް ތައްޔާރުކުރުމަށް ތެލާއި ބަޓާ އެޅުމަށްފަހު ހޫނުވުމުން ފިޔާ ކޮޅާއި ލޮނުމެދު ކޮޅު އަޅައި މީރުކޮށްލާނީއެވެ.
5. ފިޔާކޮޅު މީރުވުމުން ދެން އަޅާނީ ޕެޕްރިކާ/ ޗިލީ ޕައުޑާ/ ގަރަމް މަސާލާ/ ކިއުމިން ޕައުޑާ/ ހަކުރު އަދި ޓޮމާޓޯ ޕޭސްޓެވެ.
6. ދެން ޓޮމާޓޯ ފޭސްޓްގެ ރޯފިލުވުމަށްފަހު ފުރަތަމަ 1 ޖޯޑުގެ ޕާސްތާ ފެން އަޅައި ރަނގަޅަށް ކައްކާލާނީއެވެ.
7. ރަނގަޅަށް ކެކި ބޮކި އަރަން ފެށުމުން ކުކުޅު ކޮޅު އަޅައި އެއްކޮށްލާނީއެވެ. ދެން އަނެއްކާވެސް އަނެއް ޖޯޑު ޕާސްތާ ފެން އަޅައި އެއްކޮށްލުމަށްފަހު ބޮކިއަރަން ފެށުމުން ހެވީ ކްރޯމް އަޅައި ކައްކާލާނީއެވެ.
8. ސޯސް ކަނޑު ރަނގަޅަށް ކެކުމުން 5-4 ކިއުބްގެ ބަޓާކޮޅު އެޅުމަށްފަހު އަނެއްކާވެސް ކައްކާލާނީއެވެ. ދެން މަޑުކުރި ފާސްތާ ކޮޅު އެޅުމަށްފަހު ރަނގަޅަށް އެއްކޮށްލުމުން ބަޓާ ޗިކެން ފާސްތާ ތައްޔާރުވީއެވެ.