ރައީސްގެ މޮރިޝަސް ސިޓީ ހާމަކުރަން ހުށަހެޅި ކުއްލި މައްސަލަ މަޖިލީހުން ބޭރުކޮށްފި

ޗާގޯސްއަކީ މޮރިޝަސްގެ ސިޔާދަތީ ބާރު ހިނގާތަނެއް ކަމަށް ބުނެ ރައީސް އިބްރާހިމް މުހައްމަދު ސޯލިހު މޮރިޝަސްގެ ސަރުކާރަށް ފޮނުވި ސިޓީ ހާމަ ކުރުމަށް ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިިފި އެވެ. ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ފުރަތަމަ ޖަލްސާއަށް މިމައްސަލަ ހުށަހެޅުއްވީ އިދިކޮޅު ޕީއެންސީގެ ޕާލިމެންޓްރީ ގުރޫޕްގެ ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު އެވެ. މެމްބަރު އާދަމް ޝަރީފު ހުށަހެޅުއްވި ގަރާރު ބަލައިގަންނަން ވޯޓި ދެއްވީ 18 މެމްބަރުން ނެވެ. ނުފެންނަ ކަމަށް 33 މެމްބަރުން ވޯޓު ދެއްވި އެވެ. އެހެން ކަމުން އެ މައްސަލަ ބަލައިގަނެ ބަހުސް ކުރަން ފާހެއް ނުވިއެވެ. ކުއްލި މައްސަލަ ހުށަހަޅުއްވަަމުން އާދަމް ޝަރީފް ވިދާޅުވީ ރާއްޖޭގެ ކަނޑުގެ ސަރަހައްދުން ބައެއް ހޯދުމަށް މޮރިޝަސްއިން އިންޓަނޭޝަނަލް ޓްރައިބިއުނަލް އޮފް ދަ ލޯ އޮފް ދަ ސީ (އިޓްލޮސް) އަށް ހުށަހެޅި މައްސަލައިގައި ރާއްޖެއިން ކުރިން ގެންގުޅުނު ސިޔާސަތު ބަދަކުކޮށްފައިވާކަން އިޓްލޮސް އިން ނެރުނު ބަޔާނުން ވެސް ދޭހަވާ ކަމަށެވެ. އަދި އިޓްލޮސްގެ ނިންމުންތަކާ ގުޅިގެން ރާއްޖެއަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބިފައިވާ ކަމަށެވެ. ރައްޔިތުންގެ މަޖިލީހުގެ އަގުލަބިއްޔަތުން މިއަދު ވަނީ އެ މައްސަލަ ބަލައިނުގަނެ ބޭރުކޮށްލާފަ އެވެ.