ރައީސް ޑރ.މުއިއްޒު ބައިވެރިވެ ވަޑައިގެންނެވި ޖަލްސާއަށް ބިސްޖަހައިފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައިވެރިވެ ވަޑައިގެންނެވި ކެމްޕެއިން ޖަލްސާއަކަށް މިރޭ ބިސް ޖަހައިފިއެވެ. މި ޖަލްސާއަކީ ހުޅުދޫ ދާއިރާގެ ޕީއެންސީ ކެންޑިޑޭޓް މުހައްމަދު ޝާހިދު (ޝާޑު) ގެ ކެމްޕެއިން ޖަލްސާއެކެވެ. ބިސް ޖަހާފައިވަނީ ޖަލްސާ ފެށުނު ފަހުންނެވެ. މަންޒަރުދުށް ފަރާތަކުން މިނިވަންއަށް މައުލޫމާތު ހިއްސާކުރަމުން ބިސް ޖަހާފައިވަނީ ޖަލްސާ ހިނގަމުންދިޔަ ތަނުގެ ކައިރީހުރި އިމާރާތުގެ މަތިންކަމަށެވެ. ޖަލްސާއަށް ބިސް ޖެހުމާއެކު ފުލުހުންގެ އެސްއޯ އޮފިސަރުންގެ ޓީމަކުން ވަނީ އެ ސަރަހައްދުގައި ހަރަކާތްތެރިވެފައެވެ. ރައީސް ބައިވެރިވެ ވަޑައިގެންނެވި ޕީއެންސީ ކެމްޕެއިން ޖަލްސާއަށް ބިހުގެ ހަމަލާއެއް ދިންނަމަވެސް މިކަމާ ގުޅިގެން އަދި މިހާތަނަށް މީހަކު ހައްޔަރުކުރިކަމަށް އެނގިފައެއް ނުވެއެވެ. ޖަލްސާ ހިނގަމުންދާ ސަރަހައްދަށް ބިސް ޖެހިނަމަވެސް ޖަލްސާ ހުއްޓާލާފައެއް ނުވެއެވެ. ރައީސުން ބައިވެރިވެ ވަޑައިގަންނަވާ ކެމްޕެއިން ޖަލްސާތަކަށް ބިސް ޖެހުމަކީ ޑިމޮކްރަސީ އޮންނަ ބައެއް ގައުމުތަކުގައި ވަރަށް އާއްމު ކަމެކެވެ.