ރައީސް އަވަހާރަކޮށްލާނެ ކަމުގެ އިންޒާރުދިން މީހާ ހައްޔަރު ކޮށްފި

ރައީސް ޑރ. މުހައްމަދު މުއިއްޒު އަށް މީސްމީޑިއާ މެދުވެރިކޮށް އަވަހާރަކޮށްލާނެ ކަމުގެ އިންޒާރު ދިން މީހާ ހައްޔަރު ކޮށްފިއެވެ. މި މައްސަލަގައި ހައްޔަރު ކޮށްފައިވަނީ، ގ. ސަންސަންގެއާގެ، އުމުރުން 40 އަހަރުގެ އަބްދުﷲ މިޔާދު އެވެ. ފުލުހުން ބުނީ، މިޔާދު ބޭނުން ކުރާކަމަށް ބެލެވޭ ފޭސްބުކް އެކައުންޓް ތަކުން، ރާއްޖޭގެ ރައީސް އަށާއި، ދައުލަތުގެ އެކި ފެންވަރުގެ ވެރިންނަށް ނިސްބަތްކޮށް މަރާލާނެ ކަމުގެ އިންޒާރު ދީފައިވާ ކަމަށެވެ. އަދި އިތުރު އެހެން ފަރާތްތަކަށް ވެސް އެކި ކަހަލަ އިންޒާރު ދީ، ހަޑިހުތުރު ބަހުން މުއާމަލާތްކޮށް، އެއް ޖިންސުން ގުޅުން ހިންގަން ހިތްވަރު ދީފައިވާ ކަމަށް ވެސް ފުލުހުން ބުންޏެވެ. ފުލުހުން ބުނީ، އޭނާ ހައްޔަރު ކޮށްފައިވަނީ، ރާއްޖޭން ބޭރުގައި ހުރެފައި ރޭގެ ވަގުތެއްގައި ރާއްޖެ އައުމުން ކަމަށެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ.