ރާއްޖޭގެ އިތުރު 9 ރަށެއްގައި އައިސްޕްލާންޓް އަޅަނީ

ރާއްޖޭގެ އިތުރު 9 ރަށެއްގައި އައިސްޕްލާންޓް އެޅުމުގެ މަސައްކަތް ކުރަމުންދާ ކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސް އިން ބުނެފިއެވެ. އެ މިނިސްޓްރީން ބުނީ މަހުގެ ކޮލިޓީ ހިފަހައްޓައި މަސްވެރިން ބާނާ މަހަށް ރަނގަޅު އަގެއް ހޯދައިދިނުމަށް ސަރުކާރުން ކުރާ މަސައްކަތްތަކުގެ ތެރެއިން ރާއްޖޭގެ ނުވަ ރަށެއްގައި އައިސްޕްލާންޓް އެޅުމުގެ މަސައްކަތް މިހާރު ފެށިފައިވާއިރު، މި މަސައްކަތް ކުރިއަށް އޮތް ހަމަ މަހެއްހާ ދުވަހުގެ ތެރޭގައި ނިންމައިލަން އަމާޒު ހިފާފައިވާ ކަމަށެވެ. އައިސްޕްލާންޓް އަޅަން ހަމަޖެހިފައިވާ 9 ރަށް:

• ހއ. ދިއްދޫ
• އއ. ރަސްދޫ
• ލ. މާމެންދޫ
• ދ. މީދޫ
• ގދ. ރަތަފަންދޫ
• ޅ. ނައިފަރު
• މ. ވޭވައް
• ގދ. ފިޔޯރީ
• ލ. މާވަށް

މީގެތެރޭގައި ހިމެނެނީ ސައުދީ ފަންޑުން ހިންގާ ފަސް ޕްރޮޖެކްޓަކާއި މިދިޔަ އަހަރު ފެނަކައާ ހަވާލުކޮށް ލަސްވާތީ އެއްބަސްވުން ބާތިލްކުރި ހަތަރު ޕްރޮޖެކްޓް ކަމަށް އެ މިނިސްޓްރީން ބުނެފައިވެއެވެ. އައިސް ޕްލާންޓްތައް އެޅުމުގެ އިތުރުން މަހުގެ ކޮލިޓީ ހިފެހެއްޓުމަށް ދޯނިތަކުގައި އާރުއެސްޑަބްލިއު ސިސްޓަމް ހަރުކުރުމަށް 200 ފުރުސަތު ހުޅުވާލާނެ ކަމަށާއި މި ފުރުސަތުގައި މަސް ދޯނިތަކުގެ ވެރިންނަށް ބޭންކް މެދުވެރިކޮށް ފަސޭހައިން ލޯނު ލިބޭނެ އިންތިޒާމް ވެސް ހަމަޖެއްސުމުގެ މަސައްކަތް ކުރާނެ ކަމަށް ފިޝަރީޒް މިނިސްޓްރީން ބުނެފައިވެއެވެ.