ރާއްޖޭގައި އީދު ނަމާދުކުރާ ވަގުތު، ހަތެއް ޖަހާއިރަށް ބަދަލުކޮށްފި

ރާއްޖޭގައި އީދު ނަމާދުކުރާ ވަގުތު އަވަސްކޮށް ހެނދުނު 07:00 ޖަހާއިރު ނަމާދުކުރާ ވަގުތުގެ ގޮތުގައި ކަނޑައަޅައިފިއެވެ. ޒަމާނުއްސުރެ ރާއްޖޭގައި އީދު ނަމާކުރަމުން އައިސްފައިވަނީ ހެނދުނު 07:30 ގައެވެ. އިސްލާމީ ކަންތައްތަކާ ބެހޭ ވުޒާރާއިން ނެރެ އާއްމުކޮށްފައިވާ ދިވެހިރާއްޖޭގައި އީދުނަމާދުގެ ޖަމާއަތް ފަށާ ވަގުތު ބަދަލުކުރުމާ ބެހޭ ނިންމުމުގައި ބުނެފައިވަނީ، އީދު ނަމާދުކުރާ ވަގުތަށް ބަދަލުގެނެސްފައިވަނީ މިހާރު ނަމާދުކުރާ ވަގުތަކީ އިރުއަރައި އިރުގެ ހޫނުކަން ގަދަވަމުން އަންނަ ވަގުތަކަށްވާތީކަމަށެވެ. މިގޮތުން މިހާރަކަށް އައިސްރާއްޖޭގައި އީދު ނަމާދުކުރަމުން އަންނަނީ މައިދާންތަކާއި ހުސްބިންތަކުގައި ފާހަގަކޮށް، އީދު ނަމާދުގެ ޖަމާއަތަށް ހާޒިރުވާ ފަރާތްތަކުގެ ތެރޭގައި ތުއްތުކުދިންނާއި، އަންހެނުންނާއި، މުސްކުޅިންނާއި، ހާއްސަ އެހީއަށް ބޭނުންވާ ފަރާތްތައް ހިމެނެތީވެ، ހޫނު ގަދަވުމުގެ ސަބަބުން އެފަރާތްތަކަށް ތަކުލީފުތައް އުފުލަންޖެހޭކަމަށެވެ. [caption id="attachment_99569" align="alignnone" width="960"] ރ.އަތޮޅު އަނގޮޅިތީމުގައި މީގެކުރިން ކުރި އީދު ނަމާދެއް...[/caption] މިގޮތުން  ކީރިތި ރަސޫލާގެ ސުންނަތުން ސާބިތުވާގޮތުންވެސް އެކަލޭގެފާނު އީދު ނަމާދުކުރައްވާފައިވަނީ އިރުގެ ހޫނު ގަދަވުމުގެ ކުރިން ޟުހާ ވަގުތުގައިކަން ފެންނަން އޮންނަ ކަމަށްވެސް އިސްލާމީ ކަންތައްތަކާ ބެހޭ ވުޒާރާއިން ބުނެއެވެ. އެ ވުޒާރާއިން ބުނީ، އީދު ނަމާދުކުރާ ވަގުތަށް ބަދަލުގެނެސްފައިވަނީ އިސްލާމީ ފަތުވާދޭ އެންމެ މަތީ މަޖިލީހާއި، ދީނީ އިލްމުވެރިންނާއި، އިސްލާމީ ކަންތައްތަކާ ބެހޭ ވުޒާރާގައި ގާއިމްކޮށްފައިވާ ފަލަކީ ހިސާބުތަކާ ކޮމިޓީއާ މަޝްވަރާކުރެއްވުމަށްފަހުގައި ކަމަށެވެ.