ރާއްޖެއިން ނުރައްކާތެރި ބައްޔެއް ކަމަށްވާ މެނިންގޮކޯކޮލް ފެނިއްޖެ

ނުރައްކާތެރި ބައްޔެއް ކަމަށްވާ މެނިންގޮކޯކޮލް ރާއްޖެއިން ފެނިއްޖެއެވެ. އެޗްޕީއޭއިން ވަނީ މި ބަލި ރާއްޖެއިން ފެނިފައިވާކަން ހާމަކޮށްފައެވެ. ނަމަވެސް ބަލި ފެތުރެމުން ނުދާކަން ވަނީ ފާހަގަކޮށްފައެވެ. މެނިންގޯކޮކަލް ބައްޔަކީ ސީރިއަސް ބެކްޓީރިއަލް އިންފެކްޝަނެކެވެ. އެ ބަލި ޖެހުމުގެ ސަބަބުން ގުނަވަންތައް ހަލާކުވުން ނުވަތަ ގުނަވަންތައް މަރުވެ އެވެ. މެނިންގޯކޮކަލް ބަލީގެ ދެ ވައްތަރެއްގެ އިންފެކްޝަން އުފެދެ އެވެ. އެއީ މެނިންޖައިޓިސް އާއި ލޭގެ އިންފެކްޝަނެވެ. މެނިންގޮކޯކޮލް ބަލީގެ އަލާމާތްތަކުގެ ތެރޭގައި ރޯގާ ޖެހުމާއި، ގަދަޔަށް ހުން އައުން، ބޮލުގައި ރިއްސުން އަދި ހޮޑުލެވުމުގެ އިތުރުން ފައިގެ ހުޅަށް ތަދުުވުން ހިމެނެ އެވެ. މި ބަލިފެތުރެނީ ވަޔާއި ކުޅުގެ ޒަރިއްޔާއިންނެވެ. އެއްތަނެއްގައި އުޅޭ ބަޔަކަށް ބަލިފެތުރުމުގެ ފުރުސަތު ބޮޑެވެ. މެނިންގޮކޯކޮލް ބަލި ފެތުރެނީ ބަލި ޖެހިފައި ހުރި މީހަކާ ޑައިރެކްޓް ކޮންޓެކްޓަކަށް ވުމުންނެވެ. އަދި މި ބަލި ފެތުރެނީ ނޭވާލައި ނިޒާމުގެ ތެރެއިންނާއި އަނގައިގެ ތެރެއިން ކަމަށްވެއެވެ. މި ބަލިން ހަށިގަނޑުގެ ތެރެއަށް ބެކްޓީރިއާ ވަދެ ސިކުނޑިއާ ސްޕައިނަލް ކޯޑަށް ބޮޑެތި ގެއްލުންތަކެއްވެއެވެ. މި ބަލީގެ ފަރުވާ އަށް ދެނީ އެންޓިބަޔޮޓިކް އެކެވެ. އަވަސް ފަރުވާ ބޭނުންވާ މި ބަލިން ރައްކާތެރިވުމަށް އެޅޭ އެންމެ މުހިއްމު ފިޔަވަޅަކީ ވެކްސިން ޖެހުމެވެ. މި ބަލީގެ އަލާމާތެއް ފެނިއްޖެ ނަމަ ވީއެންމެ އަވަހަކަށް ފަރުވާ ހޯދަން ވާނެއެވެ. ނޫން ނަމަ ބަލީގެ ސަބަބުން ފުރާނައަށް ނުރައްކާވުމުގެ ފުރުސަތު ބޮޑެވެ.