ރާއްޖޭގައި އައިވީއެފް ހެދޭ އެންމެ މަތީ އުމުރަކީ 42 އަހަރު

ދަރިމައިނުވުމުގެ މައްސަލަ ހުންނަ ފަރާތްތަކަށް ރާއްޖޭގައި އައިވީއެފް ހެދޭ އެންމެ މަތީ އުމުރަކީ 42 އަހަރު ކަމަށް ސަރުކާރުން ކަނޑައަޅާފިއެވެ. މިދިޔަ މަހުގެ ފަހުކޮޅު ރާއްޖޭގައި ފުރަތަމަ ފަހަރަށް ޓްރީ ޓޮޕް ހޮސްޕިޓަލްގައި ވަނީ އައިވީއެފްގެ ހިދުމަތްދޭން ފަށާފައެވެ. އެގޮތުން މީގެ ކުރިން ރާއްޖެއިން ލިބެން ނެތް މި ހިދުމަތުގެ ސަބަބުން ވަރަށް ގިނަ ބައެއްގެ އުއްމީދުތައް އާލާވެއްޖެއެވެ. ހެލްތު މިނިސްޓްރީން "ނެޝަނަލް ސްޓެންޑަޑް ފޯ އެސިސްޓެޑް ރީޕްރޮޑަކްޓިވް ޓެކްނޮލޮޖީ" ގެ ނަމުގެ އެކުލަވާލި ގައިޑްލައިންގައިވާ ގޮތުން، އައިވީއެފްގެ ފަރުވާ ދިނުމުގެ ކުރިން ބަލަން ޖެހޭނެ ޝަރުތުތަކެއްވެއެވެ. އައިވީއެފްގެ ޝަރުތުތައް:

• އުމުރުން 40 އަހަރުން ދަށުގެ އަންހެނުން، ދޭތެރެ ދުރުކުރާ ވަސީލަތެއް ބޭނުންނުކޮށް އެއް އަހަރު ވާންދެން ދަރިއަކު ހޯދަން މަސައްކަތް ކުރުން
• ނުވަތަ އާޓިފިޝަލް އިންސެމިނޭޝަންގެ 12 ސައިކަލް ފުރިހަމަ ކުރުން (މަދުވެގެން ހަ ސައިކަލް ވާން ޖެހޭނީ އިންޓްރަޔުޓެރިން އިންސެމިނޭޝަންއަށް)
• އެފަދަ މީހުންނަށް، އައިސީއެސްއައި ހިމަނައިގެން ނުވަތަ ނުހިމަނާ، އައިވީއެފްގެ ތިން ބުރުގެ ފުރުސަތު ދިނުން
• ފަރުވާ ދެނިކޮށް 40 އަހަރު ފުރިއްޖެ ނަމަ، އެ ބުރު ނުވަތަ ސައިކަލް ފުރިހަމަ ކުރުން. އެކަމަކު އޭގެ ފަހުން އިތުރު ބުރެއްގެ ފުރުސަތު ނުދިނުން

އައިވީއެފް ހެދުމުގައި އުމުރުން 40 އަހަރުން މަތީގެ އަންހެނުންނަށް ކަނޑައަޅާފައިވާ އުސޫލުތަކުގެ ތެރޭގައި، އުމުރުން 40-42 އަހަރާ ދެމެދުގެ އަންހެނުން، ގުދުރަތީ ގޮތުން ދަރިއަކު ހޯދަން އެއް އަހަރު ވަންދެން މަސައްކަތް ކުރުން ހިމެނެއެވެ. އަދި އެއަށްފަހު، އިތުރު ތިން ޝަރުތަކާއިއެކު އައިސީއެސްއައި ހިމަނައިގެންނާއި އަދި ނުހިމަނާ ވެސް، އައިވީއެފްގެ އެއް ބުރުގެ ފުރުސަތު ދެއެވެ. އެއީ މީގެ ކުރިން އައިވީއެފްގެ އެއްވެސް ޓްރީޓްމަންޓެއް ނަގާފައި ނުވުމާއި، ލޯ އޯވޭރިއަން ރިޒާވްއެއް ނެތުމާއި އަދި އައިވީއެފް ހަދަން ބާރުދޭ ނުވަތަ މާބަނޑުވާން ޖެހޭ ކަމަށް ބާރުދޭ އިތުރު ސިއްހީ ސަބަބެއް ހުރުމެވެ. ރާއްޖޭގައި އައިވީއެފް ހެދޭނެ އެންމެ މަތީ އުމުރުގެ ގޮތުގައި 42 އަހަރު ކަނޑައެޅީ، ދުނިޔޭގެ ބައެއް ގައުމުތަކުގައި ގެންގުޅޭ އުސޫލުތަކަށް ބަލައި، އަދި ގައިޑްލައިންގައި ބުނެފައިވާ ގޮތުގެ މަތިންނެވެ. އުމުރުން މާ ދޮށީ މީހުން އައިވީއެފް މެދުވެރިކޮށް ކުދިން ހޯދުމަކީ އެ ކުދިންނަށް ސިއްހީ ތަފާތު މައްސަލަތަކާއި ކުރިމަތިލުމަށް ވަރަށް ގާތް ކަމެކެވެ. އައިވީއެފް ހަދަން ރާއްޖެއިން ބޭރުން 3-4 ލައްކައެއްހާ ރުފިޔާ ހަރަދުވާއިރު، މިފަދަ ހިދުމަތެއް ރާއްޖޭގައި ގާއިމުވުމުން ބޭރަށް ނުގޮސް، އާއިލާގެ ކައިރީގައި ހުރެގެން، ފަރުވާ ހޯދުމުގެ ފުރުސަތު ލިބިގެންދެއެވެ. އެހެންކަމުން، މިލިއަނެއްހާ ޑޮލަރު (15.4 މިލިއަން ރުފިޔާ) ހަރަދުކޮށްގެން ޓްރީޓޮޕް ހޮސްޕިޓަލުގައި ގާއިމްކުރި ސެންޓަރުން ރާއްޖޭގައި އެ ހިދުމަތް ދެނީ 46،000ރ. އަށެވެ.