ޕީޖީ އޮފީހުގެ މަސައްކަތްތައް ކާމިޔާބުވާނީ ފުލުހުންގެ މަސައްކަތްތަށް ކާމިޔާބު ވެގެން: ޕީޖީ ޝަމީމް

ޕްރޮސެކިއުޓަރ ޖެނެރަލް (ޕީޖީ) އޮފީހުގެ މަސައްކަތްތައް ކާމިޔާބުވާނީ ފުލުހުންގެ މަސައްކަތް ކާމިޔާބުވެގެން ކަމުގައި ޕްރޮސެކިއުޓަރ ޖެނެރަލް އަލްއުސްތާޒް ހުސައިން ޝަމީމް ވިދާޅު ވެއްޖެ އެވެ. ޝަމީމް މިހެން ވިދާޅުވީ، ނ. އަތޮޅުގައި މަސައްކަތްކުރާ ފުލުހުންނަށް ޕްލީ ޕްލީ ބަރގެއިނިންގ ޓްރެއިނިންގ ޕްރޮގްރާމް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތު ޝަރަފުވެރިކޮށްދެއްވީ ޕްރޮސެކިއުޓަރ ޖެނެރަލް އަލްއުސްތާޒް ހުސައިން ޝަމީމް އާއި ނޯތު ޕޮލިސް ރީޖަން ކޮމާންޑަރ ޗީފް ސްޕްރންޓެންޑެންޓް  މޫސާ އަލީއެވެ. ރަސްމިއްޔާތުގައި ވާހަކަފުޅު ދައްކަވަމުން ޝަމީމް ވިދާޅުވީ، ޕީޖީ އޮފީހުގެ މަސައްކަތްތައް ކާމިޔާބުވާނީ ފުލުހުންގެ މަސައްކަތް ކާމިޔާބުވެގެންކަމަށާއި، ފުލުހުންގެ މަސައްކަތް ކާމިޔާބުވަނީ ޕީޖީގެ މަސައްކަތް ކާމިޔާބުވެގެން ކަމުގައެވެ. އެގޮތުން ދެ މުއައްސަސާގެ މީހުންގެ އަމާޒަކަށް ވާންވާނީ މިހާރަށް ވުރެ ބޮޑަށް ގުޅިގެން މަސައްކަތްކޮށް، ދިމާވާ ހުރަސްތައް ނައްތައިލުން ކަމަށް ޝަމީމް ވިދާޅުވިއެވެ. އަދި ޕްރޮސެކިއުޓަރ ޖެނެރަލް އޮފީހުން ދިމާވާ ދަތިތަކަށް ލުއިފަސޭހަކަމެއް ގެނެސްދެއްވުމަށް މަސައްކަތް ކޮށްދެއްވާނެ ކަމަށް ވެސް ޝަމީމް ވަނީ ވިދާޅުވެފައެވެ. މި ރަސްމިއްޔާތުގައި މޫސާ އަލީ ދެއްކެވި ވާހަކަފުޅުގައި، މިފަދަ ޕްރޮގްރާމެއް ނ. އަތޮޅުގައި ހިންގައިދެއްވިކަމަށްޓަކައި ޕްރޮސެކިއުޓަރ ޖެނެރަލަށް ޝުކުރު އަދާކުރެއްވިއެވެ. އަދި މި ޕްރޮގްރާމްގެ ސަބަބުން ރީޖަންގެ މަސައްކަތްތައް އިތުރަށް ހަރުދަނާވެ މައްސަލަތައް ތަހުގީގު ކުރުމުގައި ބޮޑެތި ފަސޭހަތަކެއް ވެގެންދާނެކަމަށް މޫސާ އަލީ ވިދާޅުވިއެވެ. މީގެ އިތުރުން، މޫސާ އަލީ ވަނީ، ޕްރޮގްރާމް ފުރިހަމަކުރި ހުރިހާ ފުލުހުންވެސް، ދަސްވި އެއްޗެހީގެ ބޭނުން އަމަލީ މައިދާނުގައި ހިފުމަށް އެދިލައްވާފައެވެ. އިއްޔެ އާއި މިއަދު ކުރިއަށް ގެންދިޔަ މި ޕްރޮގްރާމްގައި، ޕްލީ ބަރގެއިނިންގ، ޕްލީ ބަރގެއިނިންގ އިން ކްރިމިނަލް ޕްރޮސީޖަރ، މައްސަލަތަކުގައި ފުލުހުން އަމަލުކުރަންޖެހޭ ގޮތްތަކާއި، ޕީޖީ އާއި ފުލުހުން ގުޅިގެންކުރާ މަސައްކަތްތަކުގައި ދިމާވާ ދަތިތަކާއި އެ ކަންކަން ހައްލުކުރުމަށް ކުރެވިދާނެ ކަންކަމާ ގުޅޭގޮތުން މައުލޫމާތު ހިއްސާކޮށްފައިވެއެވެ. އޭގެ އިތުރުން، ޕްރޮގްރާމްގެ ތެރެއިން ވަނީ ޕީޖީއޯ އޮންލައިން ޕޯޓަލް ލޯންޗުކުރުން ވެސް ކުރިއަށް ގެންގޮސްފައެވެ. މި ޕްރޮގްރާމުގައި ކްލާސްތައް ނަންގަވައިދެއްވީ ޕްރޮސެކިއުޓަރ ޖެނެރަލް އަލްއުސްތާޒް ހުސައިން ޝަމީމް އާއި ޑެޕިއުޓީ ޕްރޮސެކިއުޓަރ ޖެނެރަލް އަލްއުސްތާޒް އަލީ ސަމީރު އާއި އެމެރިކާގެ  ބޭފުޅެއްކަމުގައިވާ މިސްޓަރ މައިކަލް ހޭމަން އާއި ޕީޖީ އޮފީހުގެ ވަކީލުންނެވެ. މި ޕްރޮގްރާމްގައި، ނ. އަތޮޅުގައި މަސައްކަތްކުރާ 23 ފުލުހުން ބައިވެރިވެ ޕްރޮގްރާމް ފުރިހަމަކޮށްފައިވެއެވެ.