ފަލަސްތީނުގެ 500 އާއިލާއަކަށް ދިވެހިންގެ ނަމުގައި ކާބޯތަކެތި ފޯރުކޮށްދީފި

ދިވެހިންގެ ނަމުގައި އިންޓަނޭޝަނަލް އެއިޑް ކެމްޕޭން (އައިއޭސީ) އިން ފަލަސްތީނުގެ އައްޒާގެ 500 އާއިލާއަކަށް ކާބޯތަކެތީގެ ޕެކޭޖް ފޯރުކޮށްދީފިއެވެ. އައިއޭސީން ބުނީ ފަލަސްތީނުގެ ގިނަ އާއިލާތައް ތިބީ ކާބޯތަކެއްޗާއި އެހެނިހެން އަސާސީ ހިދުމަތްތަކަށް ބޭނުންވެފައި ކަމަށާއި ދިވެހިންގެ ފަރާތުން ލިބޭ އެއްބާރުލުމަށް އަބަދުވެސް ޝުކުރުވެރިވާ ކަމަށެވެ. އެގޮތުން މިވަގުތު ކާބޯތަކެތި އެންމެ ބޮޑަށް ބޭނުން ޖެހިފައިވާ ސައުތް ޣައްޒާގެ ރަފާޙްގައި ގެދޮރު ގެއްލި ޓެންޓްތަކުގައި ދިރިއުޅެމުންދާ 500 އާއިލާތަކަށް ކާބޯތަކެތީގެ ޕެކޭޖްތަކެއް ފޯރުކޮށްދީފައިވާ ކަމަށް އައިއޭސީން ވަނީ ބުނެފައެވެ. ކޮންމެ ޕެކޭޖެއްގައި ހުންނާނެ ތަކެތި:

• 2 ކިލޯ ޓޮމާޓޯ
• 1 ކިލޯ ކިއުކަންބާ
• 1 ކިލޯ ސްވީޓް ޕެޕާ
• 1.5 ކިލޯ ފިޔާ
• 1/2 ހޮޓް ޕެޕާ
• 1/2 ކިލޯ ލުނބޯ
• 1.5 ކިލޯ ބަށި
• 1.2 ކިލޯ އޮރެންޖް

ދާދި ފަހުން ދިވެހިންގެ ނަމުގައި ފަލަސްތީނަށް ފުށްވެސް ހަދިޔާކޮށްފައިވާއިރު، މިއީ ވަރަށް ކުޑަ މިންވަރެއް ކަމަށާއި އަދިވެސް އެހީތެރިކަން ފަލަސްތީނުގެ އާއިލާތަކުން ވަރަށް ބޮޑަށް ބޭނުން ޖެހިފައިވާ ކަމަށް އައިއޭސީން ދަނީ ތަކުރާރުކޮށް ބުނަމުންނެވެ. އިޒްރޭލުން ފަލަސްތީނަށް ކެނޑިނޭޅި ހަމަލާތައް ދެމުންދާތާ މިހާރު ވަނީ 100 ދުވަހާއި ކައރިިވެފައެވެ. މި ހަމަލާތަކުގެ ސަބަބުން ކޮންމެ ދުވަހަކުވެސް އެތަށް ސަތޭކަ މީހުން ޝަހީދުވެ ގިނަ ބަޔަކަށް ޒަހަމްވެއެވެ. އަދި ކާބޯތަކެތި ލިބުމަށް ދަތިވުމުގެ ސަބަބުން ބަނޑުހައިކަމުގައި ޝަހީދުވާ މީހުންގެ އަދަދުވެސް މިހާރު އަންނަނީ މަތިވަމުންނެވެ. އެގޮތުން އެ ނިކަމެތި އާއިލާތަކަށް އެހީތެރިވުމަށް ބޭނުން ފަރާތްތަކުން އައިއޭސީގެ ބޭންކު އޮފް މޯލްޑިވްސް އެކައުންޓް ނަމްބަރު 7770000062471 އަށް ފައިސާ ފޮނުވުމަށާއި އެހެނިހެން ސާމާނު ހަދިޔާ ކުރަން ބޭނުން ފަރާތްތަކަށް އެފުރުސަތު ވެސް އަދިވެސް ވަނީ ހުޅުވާލެވިފައެވެ.