ޕާކިސްތާނުގެ ބަލޯޗީ ޕްރޮވިންސްގައި ދެމުންދާ ހަމަލާތަކުގައި މަރާލި މީހުންގެ އަދަދު 60 އަށް އަރައިފި

ޕާކިސްތާނުގެ ބަލޯޗީ ޕްރޮވިންސް ގެ ހަނގުރާމަވެރި ޖަމާއަތަކުން އެ ޕްރޮވިންސް ގެ އިކި ސަރަޙައްދުތަކުން ގިނަ އަދަދެއްގެ ބަޔަކު މިއަދު މަރާފައިވާއިރު މެރި މީހުންގެ އަދަދު 60 އަށް ވުރެ މައްޗަށް އަރައިފިކަމަށް ޕާކިސްތާނުގެ އަސްކަރީޔާއިން ބުނެފިއެވެ. ޕާކިސްތާނުގެ ހަނގުރާމަވެރި ޖަމާއަތެއް ކަމަށްވާ ބަލޯޗް ލިބަރޭޝަން އާމީ ގެ ހަނގުރާމަވެރިން ބަލޯޗީ ޕްރޮވިންސްގެ މަގުތަކަށް ނިކުމެ ބަސްތަކާއި ކާރުތަކާއި މަގުމަތިން ހިފަހައްޓައި ބަލާފާސްކުރުމަށްފަހު ޕަންޖާބްދަރިކޮޅުގެ މީހުން ދިޔައީ މަރަމުންނެވެ. އަދި ވެހިކަލްތަކަށްވެސް ދިޔައީ ހަމަލާދެމުންވެ. ފުރަތަމަ ހާދިސާގައި ޕާކިސްތާނުގެ ޕަންޖާބު ޕްރޮވިންސަށް ނިސްބަތްވާ 23 މީހުން މަރާލާފައިވަނީ ބަލޯޗިސްތާނުގެ މުސާކިސްތާން ޑިސްޓްރިކްޓްގައި ދަތުރުކުރަމުން ދިޔަ ބަސްތަކުން މީހުން ބާލައި އެ މީހުންގެ ވަނަވަރު ބެލުމަށް ފަހު ދިން ހަމަލާއެއްގަ އެވެ. މިއަދު ބަލޯޗީގައި ދެމުންދާ ހަމަލާތަކުގައި މަރުވިމީހުންގެ ތެރޭގައި ސިފައިންގެ 14 މީހަކާއި ހަނގުރާމަވެރި ޖަމާއަތުގެ 21 މީހުން މަރުވެފައިވާކަމަށް ސިފައިންވެސް ވަނީ ބުނެފައެވެ. އެ ހާދިސާތަކާ ބެހޭ ގޮތުން ބަލޯޗިސްތާން ޕްރޮވިންސް ސަރުކާރުން ބުނެފައިވަނީ ހަނގުރާމަވެރިން މިހާތަނަށް 35 ވެހިކަލަކަށް ހަމަލާދީފައިވާކަމުގެ ރިޕޯޓް ލިބިފައިވާކަމަށެވެ. ބަލޯޗް ލިބަރޭޝަން އާމީ އަކީ ބަލޯޗިސްތާނުގެ ގުދުރަތީ މުއްސަނދިކަމުގެ ނާޖާއިޒު ފައިދާ ނަހަމަ ގޮތުގައި ސަރުކާރުން ނަގަމުންދާ ކަމަށް ބުނެ، އެތައް ޒަމާނެއް ވަންދެން މަރުކަޒީ ސަރުކާރާ ދެކޮޅަށް ހަނގުރާމަ ކުރަމުން އަންނަ ހަނގުރާމަވެރި ޖަމާއަތްތަކުގެ ތެރެއިން އެންމެ ބޮޑު ޖަމާއަތެވެ.