އޮންއެރައިވަލް ވިސާގައި މިސްްރަށް ދަތުރު ކުރެވޭ ގޮތް ހަމަޖެހިއްޖެ

މި މަހުގެ 14 ވަނަ ދުވަހުން ފެށިގެން އޮންއެރައިވަލް ވިސާގައި ދިވެހިންނަށް މިސްރަށް ދަތުރު ކުރެވޭ ގޮތަށް އަލުން ދިވެހި ރާއްޖެ ހިމަނައިފިއެވެ. މިކަމާ ގުޅިގެން ފޮރިން މިނިސްޓާރު އަބްދުﷲ ޝާހިދު ކުރެއްވި ޓުވީޓެއްގައި ވިދާޅުވީ، "ވިސާ އޮން އެރައިވަލް" ލިބޭ ގައުމުތަކުގެ ލިސްޓުގައި އަލުން ދިވެހިރާއްޖެ ހިމަނުއްވައިދެއްވިކަމަށްޓަކައި މިސްރުގެ ފޮރިން މިނިސްޓަރ ސަމެހް ޝުކްރީއަށް ޝުކުރު ދަންނަވާ ކަމަށެވެ. މީގެ އިތުރުން މިނިސްޓާރު ޝާހިދު ވިދާޅުވީ މިކަމަކީ ދިވެހިރާއްޖެއާއި މިސްރާ ދެމެދު އޮތް ހާއްސް ގުޅުން ރަމްޒުކޮށްދޭ އަލިގަދަ ހެއްކެއް ކަމަށެވެ. https://twitter.com/abdulla_shahid/status/1670303669424893953 މި މަސް ފެށުނު އިރު މިހާތަނަށް 56 ގައުމަކުން، އެ ގައުމުތަކަށް ދަތުރުކުރާ ދިވެހިންނަށް އޮންއެރައިވަލް ވިސާ ދޫކުރާކަން ވަނީ ފާހަގަކުރެވިފައެވެ. އެގޮތުން "ވިސާ އޮން އެރައިވަލް" ލިސްޓުގައި ދިވެހިރާއްޖެ ހިމެނުމާއިއެކު ވިސާ ހޯދުމަކާއި ނުލާ އެގައުމަށް 30 ދުވަހުގެ މުއްދަތަކަށް ދިވެހިންނަށް ދަތުރު ކުރުމުގެ ފުރުސަތު ލިބިގެން ދާނެއެވެ.