ނަޝީދުގެ އިތުބާރުނެތްކަމުގެ މައްސަލަ ކުރިއަށްދާނެ: މަޖިލިސް

ރައްޔިތުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ލިބިފައިވާ ކަމަށް މަޖިލީހުގެ އިދާރާ އިން ބުނެފިއެވެ. މަޖިލީހުގެ އިދާރާ އިން ކުރި ޓްވީޓެއްގައި ބުނީ، ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތީން ރައްޔިތުންގެ މަޖިލީހަށް ހުށަހަޅާފައިވާ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދާނެ ކަމަށެވެ. ނަޝީދު މަޖިލީހުގެ ރައީސްގެ މަގާމުން ވަކި ކުރަން މަޖިލިހުގެ 54 މެމްބަރުންގެ ސޮޔާ އެކު، އެމްޑީޕީން އެ މައްސަލަ ރައްޔިތުންގެ މަޖިލިހުގެ އިދާރާ އަށް އިއްޔެ ވަނީ ހުށަހަޅާފައެވެ. ނަޝީދު ވަކިކުރަން ހުށަހެޅި މައްސަލައިގައި ތުހުމަތު ކުރަނީ، މަޖިލިހުގެ ގަވައިދާ ހިލާފަށް ތަކުރާރުކޮށް ކަންތައް ކުރައްވާ ކަމަށެވެ. އެގޮތުން މެމްބަރުންނައި އިންޒާރު ދެއްވައި ފުރައްސާރަކުރައްވާ ކަމަށް ވެސް ހުށަހެޅި ގަރާރުގައި ވެއެވެ. ރައްޔިތުންގެ މަޖިލީހުގެ ގަވާއިދުގައިވާގޮތުން މަޖިލީހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާއަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަގުލަބިއްޔަތުން ފާސްކުރެއްވުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށްވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ ނަޝީދު މަގާމުން ވަކިކުރަން 44 ވޯޓު ބޭނުންވާނެއެވެ.