އަންނަ އަންގާރަ ދުވަހުން ފެށިގެން މާލޭ ސަރަހައްދުގައި މިފްކޯގެ ފިހާރަތަކުން އެކަނި މަސް ދަޅު ދޫކުރާގޮތަށް ނިންމައިފި އެވެ.
ސިޓީތަކާއި ކައުންސިލްތަކާ ބެހޭ މިނިސްޓަރު އާދަމް ޝަރީފް މިއަދު އެކްސްގައި ވިދާޅުވީ މިފްކޯގެ ފިހާރަތަކުން މަސްދަޅު ދޫކުރާ ގޮތަށް ނިންމީ މާލޭގެ ގިނަ ފަރާތްތަކަށް މަސްދަޅު ދޫކޮށް ނިމިފައިވާތީ ކަމަށެވެ.
އެގޮތުން މާލެ އަދި ހުޅުމާލޭގައި ހުރި މިފްކޯގެ 4 ފިހާރަ ހުޅުވިފައި ހުންނަ ގަޑި ތަކުގައި މަސްދަޅު ދޫކުރަމުން ގެންދާނެ ކަމަށް މިނިސްޓަރު ވިދާޅުވި އެވެ.
"ރޯދަ ހަދިޔާ ދޫކުރާ މަރުކަޒުތައް 11 ވަނަ ދުވަހުން ފެށިގެން ބަދަލުވީ ނަމަވެސް، ދޫކުރުން ކުރިޔަށްދާނީ މިހާރެކޭ އެއްގޮތަށް، އޮންލައިން ޓޯކަން ނިޒާމުގެ ތެރެއިންކަން ފާހަގަކުރަން. އަދި ބޭނުންވާ ހުރިހާ ފަރާތްތަކަށް ލިބެންދެން ކުރިޔަށްދާނެ." މިނިސްޓަރު ވިދާޅުވި އެވެ.
މާލޭ ސަރަހައްދުގެ 13 ސަރަހައްދަކުން މަސްދަޅު ދެން ބަހާނީ މިރެއާއި މާދަމާ ރޭ އެކަންޏެވެ.
