މިއަދުން ފެށިގެން ކީރިތި ގުރުއާން ކިޔަވާދޭ ކޯސްތައް ހިންގޭނީ ވަކި ގަވައިދަކުން ކަމަށް ކަނޑައަޅައިފި

ކީރިތު ގުރުއާން ކިޔަވައިދިނުމުގައި ހިމެނޭ މިނިމަން ސްޓެންޑަޑް ކަނޑައަޅައި އާންމުކޮށްފި އެވެ. މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ނެރުނު މިނިމަން ސްޓެންޑަޑް ގައި ބުނާ ގޮތުން، ކީރިތި ގުރުއާން ކިޔަވައިދިނުމަށް ހިންގާ ތަމްރީނުތައް ހިންގޭނީ އެގަވައިދާ އެއްގޮތަށެވެ. އެ ސްޑެންޑާޑް ކަނޑައެޅުމުގެ މަގުސަދުތަކުގެ ތެރޭގައި، އާންމުންނާއި އެ ދާއިރާގެ މާހިރުންގެ މެދުގައި، ކިޔަވާ ކުދިންގެ ފެންވަރާ މެދު އުފެދޭ ކަންބޮޑުވުން ކުޑަކުރުމާއި، ފެންވަރު ރަނގަޅު ޓިޗަރުން އުފެއްދުމާއި، ތައުލީމުދޭ ތަންތަނުގެ ފެންވަރު އެއްގޮތް ކުރުން ހިމެނޭ ކަމުގައި އެމްކިއުއޭ އިން ބުންޏެވެ. ކީރިތި ގުރުއާން ކިޔަވާ ދެވޭނެ މޮޑިއުލް ތަކާއި ކޯ މޮޑިއުލްތައް، ސެޓްފިކެޓް ކޯހުން ފެށިގެން ބެޗްލާސް ޑިގްރީއާ ހަމައަށް އެ ސްޓެންޑާޑް ގައި ތަފްސީލުކޮށްފައި ވެއެވެ. އަދި ކޯސްތަކުގެ މުއްދަތާއި ކޮލިފިކޭޝަން އާ އެއްގޮތަށް ލިބެންޖެހޭ ކްރެޑިޓް ވެސް ބަޔާންކޮށްފައި ވެއެވެ. މީގެ އިތުރުން ކޯސްތަކުގައި ބައިވެރި ވުމުގެ އެންޓަރީ ކްރެޓިރިއާ ވެސް އެ ސްޓެންޑާޑް ގައި ވެއެވެ. އެ ސްޓެންޑާޑް އަށް އަމަލު ކުރަން ފަށާނީ، ގެޒެޓް ކުރާ ދުވަހުން ފެށިގެންކަމަށް އޮތުމުން، މިއަދުން ފެށިގެން އެއަށް އަމަލުކުރަން ފަށާނެ އެވެ.