މި ރަމަޟާން މަހު ދުވާލު ކެއުމުގެ 4 މައްސަލައެއް ފުލުހުންނަށް ހުށަހެޅި

މިރަމަޟާން މަހުގެ ފުރަތަމަ ފަނަރަދުވަސް ތެރޭގައި ދުވާލު ކެއުމުގެ ހަތަރު މައްސަލައެއް ފުލުހުންނަށް ހުށަހަޅާފައިވާކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ. ރަމަޟާން މަހު ދުވާލު، ކެއުމުގެ ގިނަ ޝަކުވާތަކެއް ފެންމަތިވެފައިވާ އިރު ، ބައެއް މީޑިއާ ތަކުން ވެސް ވަނީ އެފަދަ މައްސަލަތައް ރިޕޯޓްކޮށްފައެވެ. އެގޮތުން އިއްޔެ މީޑިއާއަކުން ބެލި ބެލުމުން ހުޅުމާލޭގެ ބީޗް ސަރަހައްދުގައި ، ކާ މަންޒަރު ފެނިފައިވާ ކަމަށް ރިޕޯޓްކޮށްފައިވެއެވެ. ހުޅުމާލޭ އިރުމަތީ ފަރާތު ގިނައަދަދެއްގެ ގެސްޓު ހައުސްތައް ހުންނަ އިރު ބެލެވޭ ގޮތުގައި ރޯދަމަހު ދުވާލުގަޑީގައި އެބީޗްގައި ގިނައިން ކަނީ ފަތުރުވެރިންނާއި ރާއްޖެއިން ބޭރު މީހުންނެވެ. ދިވެހިރާއްޖޭގެ ގާނޫނުލްއުގޫބާތުގައިވާ ގޮތުން ގަބޫލުކުރެވޭ ފަދަ ދީނީ އަދި ސިއްހީ ސަބަބެއް ނެތި ރޯދަ ދޫކޮށްލިކަން ކޯޓަށް ސާބިތުވެއްޖެނަމަ، ނުވަ ދުވަހާއި ތިން މަހާ ދެމެދުގެ މުއްދަތަކަށް ޖަލަށް ލެވޭނެއެވެ.