މި އަހަރު އަމީރުލްޙައްޖުގެ ގޮތުގައި ވަޑައިގަންނަވާނީ ނައިބު ރައީސް

1444 ވަނަ އަހަރު ހައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރާ ހައްޖާޖީންގެ ކަންތައްތައް އިސްކޮށް ބެލެހެއްޓެވުމަށްޓަކައި، އަމީރުލްޙައްޖުގެ ގޮތުގައި ވަޑައިގަންނަވާ ބޭފުޅަކީ،  ނައިބު ރައީސް ފައިސަލް ނަސީމް ކަމުގައި ރައީސް އިބްރާހީމް މުޙައްމަދު ސޯލިހު ހަމަޖައްސަވައިފިއެވެ. ދިވެހި ޙައްޖާޖީންގެ އެންމެހާ ކަންކަމަށް ހާއްސަ ސަމާލުކަމެއް ދީގެން ހުރިހާ އިންތިޒާމުތަކެއް ވީހާވެސް ފުރިހަމަޔަށް ގެންދިޔުމަށް ބާރު އެޅުމަށްޓަކައި ސަރުކާރުން ކޮންމެ އަހަރަކުވެސް ދަނީ ގިނަ މަސައްކަތްތަކެއް ކުރަމުންނެވެ. ކޮންމެ އަހަރެއްގައިވެސް ރާއްޖެއިން ހައްޖަށްދާ މީހުންގެ ކަންކަން އެންމެ ގާތުން ބެލެހެއްޓެވުމަށްޓަކައި ސަރުކާރުގެ އިސްވެރިއަކު ވަޑައިގަންނަވައެވެ. މިދިޔަ އަހަރު ވަޑައިގެންނެވީ މިނިސްޓަރ އޮފް އިސްލާމިކް އެފެއަރޒް ޑރ.އަހްމަދު ޒާހިރު އަލީއެވެ. މިއަހަރު ރާއްޖެއަށް ލިބުނު 1000 ކޯޓާގެ ތެރެއިން 270 ޖާގަ ދީފައިވަނީ އަމިއްލަ ކުންފުނިތަކަށެވެ. ސަރުކާރުން އަންނަނީ ރާއްޖެއަށް ދެމުން އަންނަ ހައްޖު ކޯޓާގެ އަދަދު އިތުރުކުރުމަށް މަސައްކަތް ކުރައްވަމުންނެވެ. މިއހަރު ރާއްޖެއިން ޙައްޖަށްދާ މީހުން މާދަމާއިން ފެށިގެން ފުރަން ފަށާނެއެވެ.