މީގެފަހުން އެސްއޯ ފުލުހުން ފޮނުވޭނީ ސީދާ، ސީޕީގެ ހުއްދަ ލިބިގެން

ފުލުހުންގެ އޮޕަރޭޝަންތަކުގައި ސްޕެޝަލިސްޓް އޮޕަރޭޝަންސް (އެސްއޯ) ފުލުހުން ފޮނުވާ އުސޫލަށް ބަދަލުގެނައުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަންގަވައިފިއެވެ. ރައީސް މިގޮތަށް އަންގަވާފައިވަނީ ޕީޕަލްސް ނޭޝަނަލް ފްރޮންޓް (ޕީއެންއެފް) އުފައްދަން ޣިޔާސުއްދީން ސްކޫލްގައި ބާއްވަން އުޅުނު ޖަލްސާއަށް ހުރަސްއެޅުމަށް އެސްއޯ ފުލުހުން ފޮނުވި މައްސަލައިގެ ރިޕޯޓް މުރާޖައާކުރުމަށްފަހުގައެވެ. ރިޕޯޓްގައިވާ ކަންތައްތަކަށް ބެއްލެވުމަށްފަހު ރައީސް ވަނީ، ފުލުހުންގެ އޮޕަރޭޝަންތަކަށް އެސްއޯ ފުލުހުން ފޮނުވަން ސީދާ  ކޮމިޝަނަރ އޮފް ޕޮލިސްގެ ހުއްދަ ހޯދަންޖެހޭގޮތަށް ބަދަލުކުރެއްވުމަށް އަމުރު ކުރައްވާފައެވެ. ރައީސުލްޖުމްހޫރިއްޔާއަށް އެރުވި ރިޕޯޓަށްފަހު އެމަނިކުފާނު ވަނީ ބައެއް ފިޔަވަޅުތައް މިހާރުން މިހާރަށް އެޅުއްވުމަށް އަންގަވާފައެވެ. މިގޮތުން އެޅުމަށް އެންގެވި ފިޔަވަޅު ތަކުގެ ތެރޭގައި ހިމެނެނީ:

• ސްޕެޝަލިސްޓް އޮޕަރޭޝަންސްތަކުގައި ފުލުހުން ބައިވެރިވާ ހާލަތްތައް އަލުން ކަނޑައަޅައި ސީދާ ސީޕީގެ ހުއްދަ ހޯދައިގެން އޮޕަރޭޝަނިގައި ބައިވެރިވުން
• ފުލުހުންގެ އޮޕަރޭޝަނަލް ކޮމާންޑް އަލުން މުރާޖައާކޮށް މިހާރުހުރި ގޮންޖެހުންތަކަށް ހައްލު ހޯދުން.
• ޢިޔާސުއްދީން ސްކޫލުގައި ފުލުހުން ހިންގި އޮޕަރޭޝަން ފުލުހުން ޑިޕްލޮއި ކުރިގޮތް ހޯދައި ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުން ތަހުގީގުކޮށް އެއްވެސް ފަރާތަކުން ފިޔަވަޅު އަޅާފައިވާނަމަ، އެކަންތަކާމެދު ޤާނޫނީ ފިޔަވަޅު އެޅުން
• އޮޕަރޭޝަންތަކުގައި މީޑިއާއަށް މައުލޫމާތުދެމުންދާ އުސޫލު މުރާޖައާކޮށް މިހާރަށްވުރެ ދެފުށް ފެންނަ އަދި ތަފްސީލީ ގޮތެއްގައި މައުލޫމާތު ދިނުން
• ޢިޔާސުއްދީން ސްކޫލުގައި ފުލުހުން ހިންގި އޮޕަރޭޝަނުގައި ބާރުގެ ބޭނުންކޮށްފައިވާ ގޮތް ބަލައި، އަޅަންޖެހޭ ފިޔަވަޅުތައް އެޅުން

މިކަމާ ގުޅިގެން ފުލުހުންގެ ބަލަދުވެރި ފަރާތް، ދާހިލީވުޒާރާއިން ނެރުނު ބަޔާނެއްގައި ބުނެފައިވަނީ ސަރުކާރުގެ ވިސްނުމަކީ އޯގާތެރި ކުލުނުވެރި ޕްރޮފެޝަނަލް އަދި ޖަވާބުދާރީވަނިވި ފުލުހުންގެ ހިދުމަތެއް ރައްޔިތުންނަށް ފޯރުކޮށްދިނުން ކަމަށެވެ.