އެމްޑީޕީގެ މަތިއުތުރު ޕްރޮވިންސްގެ ރައީސް ކަމަށް އަކްރަމް އިންތިހާބުކޮށްފި

އެމްޑީޕީގެ މަތި އުތުރު ޕްރޮވިންސްގެ ރައީސް ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އިންތިހާބުވެއްޖެއެވެ. މި އިންތިހާބު އަކްރަމް ކާމިޔާބުކުރެއްވީ ބޮޑު ތަފާތަކުންނެވެ.  އިންތިހާބުގައި 4129 މީހުން ވޯޓުލާފައިވާ އިރު، އިންތިހާބު އަކްރަމް ކާމިޔާބު ކުރެއްވީ 2،988 ވޯޓުންނެވެ. އެއީ ވޯޓުލީ މީހުންގެ 71 ޕަސެންޓެވެ. މި އިންތިހާބުގައި އަކްރަމާ ވާދަކުރެއްވީ ހެލްތް މިނިސްޓްރީގެ ސްޓޭޓް މިނިސްޓަރު އަހްމަދު އާދިލާއި ހެރިޖޭޓް މިނިސްޓްރީގެ ސީނިއާ ޕޮލިސީ ޑިރެކްޓަރު އަހްމަދު ހާޝިމެވެ. މީގެތެރެއިން އާދިލަށް 850 ވޯޓް ލިބުނުއިރު ހާޝިމަށް ލިބުނީ 291 ވޯޓެވެ. https://twitter.com/Akramkdeen/status/1604109122168725505

އެމްޑީޕީގެ މަތި އުތުރު ޕްރޮވިންސްގެ މަގާމު ހުސްވީ، އެ މަގާމަށް ކުރިން އިންތިހާބު ކުރި އިބްރާހީމް ވަހީދު (އިބުރޭ) އެމްޑީޕީގެ ޑެޕިއުޓީ ޗެއާޕާސަންގެ މަގާމަށް އިންތިހާބުވުމާ ގުޅިގެންނެވެ.