އެމްޑީޕީގެ ކެނޑިޑޭޓުންނާ ދިމާކުރުން އިތުރުވެއްޖެ: ފައްޔާޒް

އެމްޑީޕީގެ ޓިކެޓުގައި ކުރިއަށްއޮތް ރައްޔިތުންގެ މަޖިލީހަށް ކުރިމަތިލައްވާފައި ތިބި ކެނޑިޑޭޓުންނަށް އަމާޒުކޮށް މި ފަހަކަށް އައިސް ހިންގާ ހަމަނުޖެހުންތައް އިތުރުވެފައިވާކަމަށް އެޕާޓީގެ ޗެއާޕާސަން  ފައްޔާޒް އިސްމާއީލް ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި މިދިޔަ ސަރުކާރުގައި އިކޮނޮމިކް މިނިސްޓަރުގެ މަގާމުވެސް ފުރުއްވެވި ފައްޔާޒް ވިދާޅުވީ މި ފަހަކަށް އައިސް އެމްޑީޕީގެ ކެނޑިޑޭޓުންނާއި ދިމާކޮށް ހިންގާ ހަމަނުޖެހުންތައް އިތުރުވެފައިވާއިރު، މިއީ ނިހާޔަތަށް ކަންބޮޑުވެ ވަޑައިގަންނަވާ ކަމެއްކަމަށެވެ. ފައްޔާޒު ވިދާޅުވީ މިއީ 2018 ވަނަ އަހަރު އިންތިހާބު ކާމިޔާބުކޮށް ވެރިކަމަށް އައި އަދި މިއަދުގެ ވެރިކަމުގައި ތިއްބެވި ފަރާތްތަކުން މީގެ ކުރިން ސިޔާސީ ފަރާތްތަކާއި ދެކޮޅަށް ބިރުދެއްކުމަށް ހިންގި  އަމަލުތަކެއް ފެށުމުގެ ކޮޅުމަތިކަމަށެވެ. ފައްޔާޒް ވިދާޅުވީ ވޭތުވެދިޔަ 48 ގަޑިއިރުގެ ތެރޭގައި އެމްޑީޕީގެ ކެނޑިޑޭޓުންނަށް އަމާޒުކޮށް ބިރުދެއްކުމުގެ އެތައް އަމަލުތަކެއް ހިންގާފައިވާކަމަށެވެ. https://twitter.com/faya_i/status/1771851149110583305 މިގޮތުން ގއ ވިލިނގިލީ ދާއިރާގެ އެމްޑީޕީގެ ރައީސް މުހައްމަދު ރައޫފަށް ފުރައްސާރަކޮށް ބިރުދައްކާފައިވާއިރު، ފ.ބިލެތްދޫ ދާއިރާއަށް ނިސްބަތްވެ ވަޑައިގަންނަވާ އެމްޑީޕީގެ މެމްބަރު ދޮންބިލެތްއަހުމަދު ހަލީމަށް ހަމަލާދީފައިވާކަން ފައްޔާޡް ފާހަގަ ކުރެއްވިއެވެ. މީގެ އިތުރުން ގއ ކޮލަމާފުށީގައި ހުންނަ އެމްޑީޕީގެ ކެމްޕެއިން ތަކެއްޗަށްވެސް ބޮޑެތި ގެއްލުންތަކެއްދީފައިވާކަމަށް ފައްޔާޒް ވިދާޅުވިއެވެ. ފައްޔާޡް ވިދާޅުވީ މި ސަރުކާރު ވެރިކަމާ ހަވާލުވުމަށްފަހު އެމްޑީޕީއަށާއި، އެޕާޓީގެ މެމްބަރުންތައް ދުއްތުރާކޮށް ދަތިކުރަމުންދާކަމަށެވެ. މިގޮތުން ސަރުކާރުގެ ކުންފުނިތަކުގައި މަސައްކަތްކުރާ އެމްޑީޕީއަށް ނިސްބަތްވާ މެމްބަރުން އެއްވެސް ސަބަބަކާނުލައި ވަޒީފާއިންވެސް ވަކިކުރަމުންދާކަމަށް އޭނާ ވިދާޅުވިއެވެ. ކުރިއަށްއޮތް ރައްޔިތުންގެ މަޖިލީސް އިންތިހާބުގެ ކެމްޕެއިން ކުރުން ފޯރިއާއެކު ކުރިއަށްދާއިރު، ބައެއް ހިސާބުތަކުގައި ހަމަނުޖެހުންތައް ހިނގަމުން އަންނަކަން ފާހަގަކޮށްލެވެއެވެ. ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އަންނަ އޭޕްރިލްމަހުގެ 21 ވަނަ ދުވަހުއެވެ. މި އިންތިހާބުގައި 93 ދާއިރާއަކަށް 386 ކެނޑިޑޭޓުން ވާދަކުރެއެވެ.