އެމްޑީޕީ ވަގުތީ ޗެއާޕާސަން ކަމަށް އިންތިހާބުވާ ވަރަށް ވޯޓް ލިބުނު ނަމަވެސް ޕާޓީގެ މަސްލަހަތު އިސްކޮށް އިންތިހާބުގައި ވާދަކުރިކުރުން ދޫކޮށްލަން ދޫކޮށްލަން ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު (ވައްޑެ) ނިންމައިފި އެވެ.
ވައްޑެެގެ އެ ނިންމުން އެމްޑީޕީއަށް ހުށަހެޅުމަށްޓަކައި ޕާޓީ ރައީސް އަބްދުﷲ ޝާހިދު އަށް އެޑްރެސްކުރައްވައި ފޮނުވާފައިވާ ސިޓީގައި ބުނެފައިވަނީ ޕާޓީގެ ވަގުތީ ޗެއާޕާސަން ކަމަށް ވައްޑެގެ ނަން ހުށަހެޅީ އެމަގާމަށް ވައްޑެގެ ނަން ހުށަހެޅުމަށް އެމްޑީޕީގެ ޕާލަމެންޓްރީ ގުރޫޕުގެ މެންބަރަކު ގުޅައި އެމަގާމް އަދާކުރުމަށް މިވަގުތައް އެންމެ ރަނގަޅު ފަރާތަކީ ވައްޑެ ކަމަށް ބުނުމާއި އަދި ޕާލަމެންޓްރީ ގްރޫޕުންވެސް އެންމެ ބޯޑަށް ބޭނުންވަނީ ވައްޑެ އެމަގާމް އަދާކުރުން ކަމަށް ބުނެފައިވާ ކަމަށެވެ.
އެހެންކަމުން ޕާލަމެންޓްރީ ގްރޫޕުގެ އެހުށަހެޅުމާ ގުޅިގެން ޕާޓީގެ ރައީސަށާއި، ޕާޓީގެ އެޑްވައިޒަރ ރައީސް ސޯލިހް އަށް ގުޅައި އެމަގާމަށް ވައްޑެ ކުރިމަތިލުމާމެދު އެ ދެބޭފުޅުންގެ މަޝްވަރާވެސް ހޯއްދަވާފައިވާ ކަމަށާއި، އެ 2 ބޭފުޅުންގެ ފަރާތުންވެސް ވައްޑެ އެ މަގާމަށް ގެނައުމަށް ދެއްވަންޖެހޭ އެއްބާރުލުން ދެއްވާނެ ކަމުގެ ޔަގީންކަމާއި އަދި ވައްޑެފަދަ ބޭފަޅަކު މިވަގުތު ޕާޓީގެ ހިންގުމާ ހަވާލުވުމަކީ ކޮންމެހެންވެސް ނުހަނު ބޭނުންތެރި ކަމެއް ކަމަށް ފާހަގަކުރައްވާފައިވާ ކަމަށްވެސް ސިޓީގައި ބުނެފައި ވެއެވެ.
އެއަށްފަހު 27 ނޮވެންބަރުގައި ވަގުތީ ޗެއާޕާސަން ހޮވުމަށް ބޭއްވި ގައުމީ މަޖިލީހުގެ ޖަލްސާގައި ނެގި ވޯޓުން އެ މަގާމަށް ވައްޑެ ހޮވޭ ވަރަށް ވޯޓް ލިބިފައި ވާކަމަށާއި، ނަމަވެސް ވައްޑެ އެމަގާމަށް ކުރިމަތިލުމަށް ހިތްވަރުދެއްވި ފަރާތްތަކާއި، އެމަގާމަށް ވައްޑެ ގެނައުމަށް ހިތްވަރުދެއްވައި ތާއިދުކުރައްވާނެ ކަމަށް ވިދާޅުވި ފަރާތްތަކުން، ވޯޓު ލުމަށް ބޭއްވި ޖަލްސާގައްޔާއި ވޯޓަށް ފަހުގައި އަމަލުކުރެއްވި ގޮތުން އެމްޑީޕީގެ ވަގުތީ ޗެއާޕާސަން ކަން ވައްޑެ ކުރުމުގައި ގޮންޖެހުންތައް ކުރިމަތިވާނެ ކަން ޔަގީންކުރެވިފައިވާތީ އިންތިހާބުގައި ވާދަކުރި ކުރިކުރުން އަނބުރާ ގެންނަން ބޭނުންވާ ކަމަށް އެ ސިޓީގައި ވައްޑެ ބުނެފައި ވެއެވެ.
އަދި އެ އިންތިހާބުގައި ވައްޑެއަށް ތާއީދުކޮސ ވޯޓްދެއްވި ފަރާތްތަކަށް ޝުކުރު އަދާކޮށް، ޕާޓީގެ ކުރިމަގަށްޓަކައި ޕާޓީގެ ލީޑާޝިޕާއެކީ ކުރިއަށްދާނެ ކަމުގެ ޔަގީންކަންވެސް ވައްޑެގެ ސިޓީގައި މެންބަރުންނަށް ދެއްވާފައި ވެއެވެ.
