އެމްޑީޕީ މަޖިލީސް ޕްރައިމަރީގެ ވޯޓުލުން ފަށައިގެން ކުރިއަށްދަނީ

ކުރިއަށް އޮތް ދައުރުގެ ރައްޔިތުން މަޖިލީހުގެ އިންތިހާބުގައި އެމްޑީޕީގެ ފަރާތުން ވާދަކުރައްވާނެ ބޭފުޅުން ކަނޑައެޅުމަށް ބާއްވާ ޕްރައިމަރީގެ ވޯޓުލުން ފަށައިފިއެވެ. މާލޭގެ އިތުރުން ރާއްޖޭގެ ގިނަ ރަށްތަކުގައި ކުރިއަށްދާ މި ޕްރައިމަރީގެ ވޯޓުލުން ފަށާފައިވަނީ މިއަދު ހެނދުނު 9 ޖެހިއިރުއެވެ. ވޯޓުލުން 5 ޖެހުމާ ހަމަޔަށް ކުރިއަށްދާނޭކަމަށް އެމްޑީޕީން ބުނެއެވެ. އިދިކޮޅު އެންމެ ބޮޑު ޕާޓީ، އެމްޑީޕީ މަޖިލިސް ޕްރައިމަރީ އިންތިހާބުގައި މިފަހަރު މާލޭގައި 27 ވޯޓް ފޮށި ބެހެއްޓިފައިވާއިރު، އަތޮޅު ތެރޭގައި 95 ރަށެއް ގައި ވޯޓް ފޮށި ބަހައްޓާފައިވެއެވެ. https://twitter.com/MDPSecretariat/status/1753644822676787209 މަޖިލީހުގެ 93 ދާއިރާއެއްގެ ތެރެއިން ޕްރައިމަރީ ބާއްވަން ހަމަޖައްސާފައިވާނީ 40 ދާއިރާއަކަށެވެ. އެ ދާއިރާތަކަށް އެމްޑީޕީގެ ޕްރައިމަރީގައި 149 ކެންޑިޑޭޓުން ވާދަކުރާއިރު، ވޯޓުލުމުގެ ހައްގު ލިބިފައިވަނީ 25،325 މީހުންނަށެވެ. އެމްޑީޕީން މީގެ ކުރިންވަނީ އެންމެ ކެންޑިޑޭޓަކު ކުރިމަތިލި ދާއިރާތަކަށް ޕްރައިމަރީއަކާ ނުލައި ޓިކެޓް ކަށަވަރުވެފައިވާކަން ހާމަކޮށްފައެވެ. އެގޮތުން ފުރަތަމަ 36 މެންބަރެއްގެ އިއުލާންކުރުމަށްފަހު އިތުރު 10 މެންބަރެއްގެ ނަން ވެސް ފަހުން ވަނީ އިއުލާންކޮށްފައެވެ. މަޖިލިސް އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ 17 ވަނަ ދުވަހުއެވެ. އެއީ ރޯދަމަހުގެ ފުރަތަމަ ހަފްތާއެވެ.