މަސްދޯނިތަކަށް ގަވައިދާ ހިލާފަށް އިންޑިއާ ސިފައިން އެރި ސަބަބު ބުނެދިނުމަށް ރަސްމީކޮށް އެދެފި

ރާއްޖޭގެ ކަނޑުގެ ސަރަހައްދުން ރާއްޖޭގެ މަސްދޯނިތަކަށް އިންޑިއާ ސިފައިން އަރާފައިވަނީ ގަވައިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ ކަމަށާއި، އެކަން ސާފުކުރުމަށް ރަސްމީކޮށް އިންޑީއާގެ ކަމާއި ބެހޭ ފަރާތްތަކަށް އަންގާފައިވާކަމަށް މޯލްޑިވްސް ނެޝަނަލް ޑިފެންސް ފޯސްއިން ބުނެފިއެވެ. ބޭރުގެ އަސްކަރިއްޔާގެ ބަޔަކު ރާއްޖޭގެ މަސްދޯނިތަކަށް އެރި މައްސަލައާ ގުޅޭގޮތުން ދިވެހި ގައުމީ ދިފާއީ ބާރުން ނެރުނު ބަޔާނުގައި ބުނެފައިވަނީ، ޖެނުއަރީމަހުގެ 31 ވަނަ ދުވަހު، ރާއްޖޭގެ މަސްދޯނިތަކަށް އަރާފައިވަނީ،  އިންޑިއާ ކޯސްޓްގާޑް ޝިޕް 246 އަދި އިންޑިއާ ކޯސްޓްގާޑް ޝިޕް 253 އަށް ނިސްބަތްވާ ބޯޑިން ޓީމްތަކުންކަން ކަށަވަރު ކުރެވިފައިވާ ކަމަށެވެ. އިންޑިއާ ސިފައިން ރާއްޖޭގެ ތިން ދޯންޏަކަށް އަރާފައިވާކަން ފާހަގަކުރަމުން ގައުމީ ދިފާއީ ބާރުން ބުނީ، އެއީ އަސުރުމާ 3 ދޯނީގެ އިތުރުން މޮހޮރާ 3 އަދި ނިރު 7 ނަމަކަށް ކިޔާ ދޯންޏަށް ކަމަށެވެ. [caption id="attachment_97045" align="alignnone" width="800"] އިންޑިއާގެ ކޯސްޓްގާޑު ޝިޕް 246[/caption] ގައުމީ ދިފާއީ ބާރުން ބުނީ، ރާއްޖޭގެ އިގްތިސާދީ ސަރަހައްދުގައި މަސްވެރިކަންކުރަމުންދިޔަ މަސްދޯނިތަކަށް ދިވެހި ދައުލަތުގެ ކަމާބެހޭ އެއްވެސް އިދާރާއަކަށް އެނގުމަކާ ނުލައި ބައިނަލްއަގްވާމީ ކަނޑުގެ ގާނޫނާ ހިލާފަށް އިންޑިއާގެ އަސްކަރިއްޔާއިން ބޯޑުކޮށް ހިންގި އޮޕަރޭޝަނުގެ ތަފްސީލް ދެއްވުމަށް ދިވެހި ހާރިޖިއްޔާ މެދުވެރިކޮށް އިންޑިއާ ސަރުކާރުގައި އިއްޔެ ދަންނަވާފައި ވާކަމަށެވެ. https://twitter.com/MoDmv/status/1753460738180747745 މިނިވަން ނޫހަށް އެނގިފައިވާ ގޮތުގައި އިންޑިއާ ސިފައިން އެ ދޯންޏަށް އަރައި ސުވާލު ކޮށްފައިވަނީ ސެޓްލައިޓް ފޯން ބޭނުންކުރާތީއެވެ. ދޯންޏަށް އެރި އިންޑިއާ ސިފައިން ސެޓްލައިޓް ފޯނު ނަމްބަރު ހޯދުމަށް އެދުނު ނަމަވެސް މަސްވެރިން ނަމްބަރު ދީފައެއް ނުވެއެވެ. އެވަގުތު އެ ސަރަހައްދުގައި ތިބި ދޯނިތަކުން ގައުމީ ދިފާއީބާރަށް ގުޅުމުން އެފަރާތުން ވަނީ ސެޓްލައިޓް ފޯނު ނަމްބަރު ނުދިނުމަށް އިރުޝާދުދީފައެވެ. ދޯނިފަހަރުގައި ސެޓްލައިޓް ފޯން ބޭނުންކުރުމަކީ ރާއްޖޭގެ ޤާނޫނުގައި މަނާ ކަމެއް ނޫނެވެ. އަދި ސެޓްލައިޓް ފޯނަކީ ސަލާމަތީ ގޮތުން ގިނަ ދޯނިފަހަރުގައި މިހާރު ބޭނުންކުރަމުންދާ މުހިންމު ވަސީލަތެކެވެ.