މާލެއިން ފުރައިގެން މަހިބަދޫއަށް ދަތުރުކުރަމުން ދިޔަ ދޯންޏެއް އަޑިއަށް ގޮއްސި

މާލެއިން ފުރައިގެން އދ. މަހިބަދޫއަށް ދަތުރުކުރަމުން ދިޔަ ދޯންޏެއް އަޑިއަށް ގޮއްސި އެވެ. ފުލުހުން ބުނީ،  އަޑިއަށް ގޮސްފައޮވަނީ 'ރިކާޑޯ' ނަމަކަށް ކިޔާ މުދާ އުފުލާ ދޯންޏެއް ކަމަށާއި، އެ ދޯނި އަޑިއަށް ގޮސްފައިވަނީ އަލިހުރަސް ކަނޑަ ކަމަށެވެ. ފުލުހުން ބުނީ، އެ ދޯނި އަޑިއަށްދާކަމުގެ މައުލޫމާތު ފުލުހުންނަށް ލިބުމާއި ގުޅިގެން އދ. ޕޮލިސް ލޯންޗް އެ ސަރަހައްދަށް ގޮސް ދޯނީގައި ތިބި މީހުން ފުލުހުންގެ ލޯންޗަށް ނަގާފައިވާ ކަމަށެވެ. މީގެ އިތުރުން ފުލުހުން ބުނީ، އެ ދޯނީގައި ތިބީ 8 މީހުން ކަމަށެވެ. އަދި އެ 8 މީހުން މަހިބަދޫ އަށް ގެންދިއުމުގެ މަސައްކަތް މިހާރު ދަނީ ކުރަމުން ކަމަށް ވެސް ފުލުހުން ބުންޏެވެ. ދޯނީގައި ތިބި އެންމެން ގެ ހާލު ރަނގަޅުކަމަށް ވެސް ފުލުހުން ވަނީ ބުނެފައެވެ. އެ ދޯނި މިހާރު ވަނީ އެއްކޮށް އަޑި އަށް ގޮސްފައެވެ. ހުޅަނގު މޫސުމުގައި ރާއްޖެ އަށް ކުރަމުން އަންނަ ވިއްސާރާގައި ރާއްޖޭގެ އެކި ހިސާބުތަކަށް މެޓް އޮފީހުން ވަނީ އެލާޓް ނެރެފައެވެ. އެހެން ކަމުން ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސް ކޮށްފައެވެ.