ކުރިއަށް އޮތް ރައްޔިތުންގެ މަޖިލީހުގެ އިންތިހާބު ރޯދައިގެ ދިހަ ދުވަސް ފަހުން ބޭއްވުމަށް، އިންތިހާބުތަކާބެހޭ އާންމު ގާނޫނަށް މަޖިލީހުން ގެނައި އިސްލާހު ތަސްދީގުކުރުން އަވަސްކުރުމަށް ގޮވާލައި ކުއްލި މައްސަލައެއް ހުށަހަޅައިފި އެވެ.
މަޖިލީހުގެ މިއަދުގެ ޖަލްސާއަށް މި ކުއްލި މައްސަލަ ހުށަހެޅުއްވީ އުނގޫފާރު ދާއިރާގެ މެންބަރު މުހައްމަދު ވަހީދު އެވެ.
މައްސަލަ ހުސަހަޅުއްވަމުން މެމްބަރު ވަހީދު ވިދާޅުވީ، އެ ބިލު ތަސްދީގުކުރަން މިމަހުގެ 12 ވަނަ ދުވަހު ރައީސުލްޖުމްހޫރިއްޔާއަށް ފޮނުއްވާފައިވާ އިރު، އަދިވެސް ބިލް ތަސްދީގު ކުރަްއވާނެ ކަމުގެ އިޝާރާތެއް ރައްޔިތުންނަށް ލިބިފައި ނުވާކަމަށެވެ.
"މި ބިލު ފޮނުވިތާ މިޙާރު ހަފުތާއަކަށްވުރެ ގިނަ ދުވަސްވެފައިވާއިރު މި ބިލު ތަސްދީގުކުރާނެ ކަމުގެ އެއްވެސް އިޝާރާތެއް މިއަދާ ހަމައަށްވެސް ރައްޔިތުންނަށް ލިބިފައިނުވޭ،" ވަހީދު ވިދާޅުވި އެވެ.
ބިލު ތަސްދީގުކުރަން ފޮނުވާފައިވަނިކޮށް މިދިޔަ ހޯމަ ދުވަހު އައްޑޫ ސިޓީގައި ބޭއްވި ޖަލްސާއެއްގައި މަޖިލިސް އިންތިހާބު އޮންނާނީ އަންނަ މަހުގެ 17 ވަނަ ދުވަހު ކަމަށް ރައީސް ޑރ. މުއިއްޒު ވިދާޅުވެފައިވާކަން ވަހީދު ފާހަގަކުރެއްވި އެވެ.
"ރައީސުލްޖުމްހޫރިއްޔާ މިހެން ވިދާޅުވެފައިވާއިރު ގާނޫނުއަސާސީގެ 91 ވަނަ މާއްދާގެ ނ. ގެ ދަށުން ބިލު ތަސްދީގުނުކޮށް އަނބުރާ ރައްޔިތުންގެ މަޖިލީހަށް ފޮނުވާނުލައްވާ ވަގުތު ބޭކާރުކޮށް ބިލު ހިފަހައްޓަވައިގެން ހުންނަވަނީ ސަރުކާރުން ބޭނުންވާ ގޮތަށް މާޗްމަހުގެ 17 ވަނަ ދުވަހު އިންތިހާބު ބޭއްވުމަށް ކަމަށް ބެލެވޭ،" ވަހީދު ވިދާޅުވި އެވެ.
އިންތިހާބު ފަސްކުރަން އިންތިހާބުތަކާބެހޭ އާންމު ގާނޫނަށް ގެނައި އިސްލާހު މަޖިލީހުން ފާސްކުރީ މިމަހުގެ 11 ވަނަ ދުވަހު އެވެ. އެ ބިލު ތަސްދީގުކުރަން މިމަހުގެ 12 ވަނަ ދުވަހު ރައީސުލްޖުމްހޫރިއްޔާއަށް ފޮނުއްވާފައިވާ ކަމަށް މެންބަރު މުހައްމަދު ވަހީދު ވިދާޅުވި އެވެ.
އެ ބިލު އަވަސްކުރުމަށް ގޮވާލާ މިއަދު މެމްބަރު ވަހީދު ހުށަހެޅުއްވި ކުއްލި މައްސަލައަށް ބަހުސްކުރަން ފެންނަ ކަމަށް 23 މެންބަރުން ވޯޓު ދެއްވިއިރު ނުފެންނަ ކަމަށް އެއް މެންބަރު ވޯޓު ދެއްވި އެވެ.
