މަޖިލީހުގެ ނައިބު ރައީސްކަމުން އީވާ ވަކިކުރަން އެމްޑީޕީން ނިންމައިފި

ރައްޔިތުންގެ މަޖިލީހުގެ ނައިބު ރައީސް އީވާ މަގާމުން ވަކިކުރަން އެމްޑީޕީގެ ޕާލިމެންޓްރީ ގްރޫޕުން މިއަދު ފާސްކޮށްފި އެވެ. އީވާ  ނައިބުރައީސް ކަމުން ވަކިކުރަން އެމްޑީޕީގެ ޕާލިމެންޓްރީ ގްރޫޕުން ފާސްކުރީ އެޕާތީގެ ޕާލިމެންޓްރީ ބައްދަލުވުމުގައި ބައިވެރިވި މެންބަރުންގެ އިއްތިފާގުންކަމަށް އެޕާޓީން ބުންޏެވެ. މަޖިލީހުގެ ރައީސް ނުވަތަ ނައިބު ރައީސް ވަކިކުރަން ހުށަހެޅޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ އެއްބައި މެންބަރުންނަށްވުރެ މަދު ނޫން އަދަދެއްގެ މެންބަރުންގެ ސޮޔާއެކު އެވެ. ރައްޔިތުންގެ މަޖިލީހުގައި 87 މެންބަރުން ތިއްބަވާއިރު 22 މެންބަރުންގެ ސޮޔާއެކު މަޖިލީހުގެ ނައިބު ރައީސް ވަކިކުރަން ހުށަހެޅޭނެ އެވެ. އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނަށް ނިސްބަތްވެވަޑައިގަންނަވާ މަޖިލީހުގެ 12 މެމްބަރަކާއި ނަޝީދުގެ އަރިސް ބޭފުޅުންތަކެއް އިއްޔެ ވަނީ އެމްޑީޕީން ވަކިވެވަޑައިގެންފަ އެވެ. އެއާ އެކު، 'ފިކުރެއްގެ ދިރުން'ގެ ނަމުގައި އާ ސިޔާސީ ޕާޓީއެއް އުފެއްދުމުގެ މަސައްކަތް ވެސް އެ ބޭފުޅުން ވަނީ ފައްޓަވާފަ އެވެ. މި ހަރަކާތުގައި އީވާ އިސްކޮށް މަސައްކަތް ކުރައްވައެވެ.