އެމްއޭސީއެލްގެ މުވައްޒަފުންގެ ބޯނަސްގެ ގޮތުގައި 25،000ރ ދެނީ

މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް)ގެ މުވައްޒަފުންގެ އަހަރީ ބޯނަސްގެ ގޮތުގައި ކޮންމެ މުވައްޒަފަކަށް 25،000ރ. ދޭން އެ ކުންފުނިން ނިންމައިފި އެވެ. ފާއިތުވި ތިން އަހަރު ވެސް  އެމްއެސީއެލް ކުންފުނީގެ ހުރިހާ މުވައްޒަފުންނަށް ހަމަހަމަވާ އުސޫލުގެ މަތިން ބޯނަސްގެ ގޮތުގައި 25،000ރ. ވަނީ ދީފައެވެ. ދައުލަތަށް އެންމެ ބޮޑު އާމްދަނީއެއް ވައްދާ ކުންފުނިތަކުގެ ތެރޭގައި ހިމެނޭ އެމްއޭސީއެލް  އަށް ފައިދާގެ ގޮތުގައި މިދިޔަ އަހަރު 1.1 ބިލިއަން ރުފިޔާ ލިބިފައި ވާއިރު، އެ ކުންފުނީގައި ތިންހާހެއްހާ މުވައްޒަފުން ދަނީ މަސައްކަތް ކުރަމުންނެވެ. އަހަރީ ބޯނަސް ދެނީ އަހަރުގެ ހަ މަސް ދުވަހަށް ވުރެ ގިނަ ދުވަހު ވަޒީފާ އަދާކުރި މުވައްޒަފުންނަށާއި، ހަ މަސް ދުވަހު ވަޒީފާގައި އުޅުމަށް ފަހު، ކެނޑުނު މުވައްޒަފުންނަށް މަސައްކަތްކުރި ދުވަހުގެ މުއްދަތަށް ބަލައިގެންނެވެ. އާންމުކޮށް އޯގަސްޓު މަހު ދެމުންދިޔަ މި ބޯނަސް ދިނުން ލަސްވުމުގެ ސަބަބުން އެ ކުންފުނީގެ މުވައްޒަފުން ވަނީ އެކަމުގެ ޝަކުވާ ވެސް މީގެ ކުރިން ކޮށްފަ އެވެ.