މި މަހުގެ 15 ވަނަ ދުވަހު ސެނަހިޔާ ހޮސްޕިޓަލް ބިތްދޮށުގައި އޮންނަ ރަތްވިލާ މަގުން ދުއްވާފައި ދިޔަ ސައިކަލެއްގައި އިން މީހަކަށް ތޫނު އެއްޗަކުން ހަމަލާދިން ކަމުގެ ތުހުމަތުގައި ދެ މީހަކު ހައްޔަރުކޮށް، އެ މީހުންގެ ވަނަވަރު ފުލުހުން މިއަދު އާންމުކޮށްފި އެވެ.
ސެނަހިޔާ ހޮސްޕިޓަލު ކައިރީގައި ޒަހަމްތަކަކާއެކު އޮއްވައި މީހަކު ފެނުނު ވާހަކަ ފުލުހުން ވަނީ މީގެ ކުރިން މީޑިއާ ހިއްސާކޮށްފަ އެވެ. އެ މައްސަލާގައި އޭރު ފުލުހުން ބުނީ އެ މީހާއަށް ސެނަހިޔާގައި ފަރުވާދީ، މައްސަލަ ބަލަމުންދާ ކަމަށެވެ.
ފުލުހުން ހަދާފައިވާ ވަޓްސްއެޕް ގްރޫޕުގައި ނޫސްވެރިއަކު ސުވާލުކުރުމުން, މި މަހު ހިނގި ގޭންގު މާރާމާރީގެ ދެ ކޭސްއެއްގެ މައުލޫމާތު ފުލުހުން ވަނީ ހިއްސާކޮށްފަ އެވެ. ފުލުހުން މިއަދު ބުނީ ސެނަހިޔާ ކައިރިން ޒަހަމްތަތަކާއެކު ފެނުނު މީހާގެ ކޭސް އަކީ ގޭންގު މާރާމާރީއެއް ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވީ އެ މީހާ އަށް ހަމަލާދީ ޒަހަމްކޮށްލާފައިވަނީ ހެނދުނު 8:17 އެހާކަންހާއިރު ކަމަށެވެ.
އެ މައްސަލާގައި ފުލުހުންގެ ހައްޔަރަށް ގެންދިޔަ 2 މީހުންނަކީ:
ހ. ރޯޒެންޑޭލް، ސަފްވާން ޒުފްރަތު (29އ)
ށ. ފޭދޫ، އުދަރެސް، އަލީ ނާޝީދު (34އ)
މީޑިއާ އޮފިޝަލް ވިދާޅުވީ ކޯޓު އަމުރެއްގެ ދަށުން އެތަނުން އެކަކު ހައްޔަރުކުރީ ހަމަލާދިންތާ 5 ދުވަސް ފަހުން، ހުސްވި ހަފްތާގެ ހޯމަ ދުވަހު އެވެ. ދެވަނަ މީހާ ހައްޔަރުކުރީ ޖެހިގެން އައި އަންގާރަ ދުވަހު ކަމަށެވެ.
އެމީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ދެ މީހުން ވެސް 5 ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފަ އެވެ.
ރޭވެސް މާރާމާރީއެއް ހިންގައި ފިހާރައެއް ކައިރިން މީހަކަށް ތޫނު އެއްޗަކުން ހަމަލާދީ ޒަހަމު ކޮށްލާފައިވެ އެވެ. އެ މާރާމާރީގައި އަނިޔާ ލިބުނު މީހާއަށް ފަރުވާ ދިނުމަށް ފަހު ހޮސްޕިޓަލުން ވަނީ ދޫކޮށްލާފަ އެވެ.
އެ މައްސަލާގައި އަދި މިހާތަނަށް މީހަކު ހައްޔަރުކޮށްފައެއް ނުވެ އެވެ. މައްސަލަ ފުލުހުންގެ ގޭންގް ކްރައިމް އިންވެސްޓިގޭޝަނުން ގެންދަނީ ތަހުގީގު ކުރަމުންނެވެ.
