މާފުށީގައި ތޫނު އެއްޗަކުން ހަމަލާދީ މީހަކު ޒަހަމް ކޮށްލައިފި

ކ. މާފުށީގައި ތޫނު އެއްޗަކުން ހަމަލާދީ މީހަކު ޒަހަމްކޮށްލައިފިއެވެ. މި މާރާމާރީ އާ ގުޅިގެން ފުލުހުންގެ މީޑިއާ އޮފިޝަލަކު "މިނިވަން" އަށް މައުލޫމާތު ދެމުން ވިދާޅުވީ، މާފުށީގައި މާރާމާރީ އެއްގައި އަނިޔާ ލިބިފައިވާ މީހަކަށް މާފުށީ ހޮސްޕިޓަލުގައި ފަރުވާދެމުންދާކަމަށް ރޭފަތިހު 5:30 އެހާކަންހާ އިރު ފުލުހުންނަށް ރިޕޯޓު ކޮށްފައިވާ ކަމަށެވެ. މި މާރާމާރީގައި އަނިޔާވެފައި ވަނީ އުމުރުން 34 އަހަރުގެ ދިވެހި ފިރިހެނަކަށެވެ. ފުލުހުން ބުނީ އެމީހާ އަށް މިހާރު ދަނީ ހުޅުމާލެ ޓްރީޓޮޕް ހޮސްޕިޓަލުގައި ފަރުވާދެމުން ކަމަށެވެ. ފުލުހުން ބުނީ، މާފުށީގައި މިއަދު އިތުރު މާރާމާރީ އެއް ހިނގާފައިވާ ކަމަށާއި، މި މާރާމާރީއާ ގުޅިގެން ދިވެހި ދެ ފިރިހެނަކު ހައްޔަރުކޮށްފައިވާ ކަމަށެވެ. މި މާރާމާރީގައި ހައްޔަރުކޮށްފައިވާ ދެ މީހުނަކީވެސް ފަތިހު ހިނގިމާރާމާރީ ގައި ބައިވެރިވި ބައެއްކަމަށް މިހާތަނަށް ބެލިބެލުމުން އެނގިފައިވާ ކަމަށްވެސް ފުލުހުން ބުންޏެވެ. ފުލުހުން ބުނީ މިމައްސަލަ ދަނީ އިތުރަށް ބަލާ ތަހުގީގު ކުރަމުން ކަމަށެވެ.