މާފަންނު ގެއެއްގައި އަލިފާނުގެ ހާދިސާއެއް ހިނގައިފި

މީގެ ކުޑައިރުކޮޅެއް ކުރިން މ.ހަލީޖު ގޭގައި އަލިފާނުގެ ހާދިސާއެއް ހިނގައިފިއެވެ. އަލިފާނުގެ މި ހާދިސާ ހިނގާފައިވަނީ އެ ގޭ އެންމެ ތިރީ ފަންގިފިލާގެ ވައިގޮޅީގައެވެ. މި ހާދިސާގައި ރޯވެފައިވަނީ އެތަނުގައި ހުރި ކުނިތަކެއްގައެވެ. މި ހާދިސާއާ ގުޅޭގޮތުން މިނިވަންއަށް މައުލޫމާތު ދެމުން ހަލީޖު ގޭގައި ދިރިއުޅޭ މީހަކު ބުނީ އަލިފާން ރޯވިކަމަށް ބެލެވެނީ މަތިން އެއްލާލި ސިނގިރޭޓް ބުރިއަކުންކަމަށް ބެލެވޭކަމަށެވެ. އަލިފާން ރޯވިތާ މާ ގިނައިރުތަކެއް ނުވެ، އެ ގޭ ކައިރީ ހުންނަ ގަރާޖުން މީހަކު ފޯމް ފުޅިއެއް ހިފައިގެން އައިސް އަލިފާންގަނޑު ނިއްވުމުގެ މަސައްކަތް ފެށިކަމަށް އޭނާ ބުންޏެވެ. އަލިފާންގަނޑު ނުފެތުރެނީސް ނިއްވާލާފައިވާއިރު، މި ހާދިސާގެ ސަބަބުން މީހަކަށް މާބޮޑު ގެއްލުމެއް ނުވެއެވެ. ނަމަވެސް ތިރީ ފްލޯގައި އުޅޭ ބައެއް މީހުނަށް ދުމުގެ އަސަރު ވަނީ ކޮށްފައެވެ. މީގެ ތެރޭގައި ތިން މަހުގެ ތުއްތު ކުއްޖަކު ހިމެނެއެވެ. މި ހާދިސާ ހިނގުމާއެކު ކުއްޖާގެ މަންމަ ވަނީ އޭނާ ގޮވައިގެން ވަގުތުން ބޭރަށް ނިކުމެފައެވެ. " އަޅުގަނޑު ނިކުމެ އަލިފާން ރޯވެއްޖެއޭ ކިޔާފަ ގޮވާލިއަޑަށް މިތާ ކުރިމަތީ ގަރާޖުން މީހަކު އަލިފާން ނިއްވާ ފުޅިއެއް ހިފައިގެން އައިސް އަލިފާންގަނޑު ނިއްވުމުގެ މަސައްކަތް ފަށައިފި. ނަސީބެއް ދަންވަރުގެ ވަގުތަކަށް ނުވިކަން. އެހެން ނޫންނަމަ ނޭނގޭ ވާނެ ގޮތެއްވެސް" މިނިވަން އާ ވާހަކަދެއްކި މީހާ ބުންޏެވެ. މި ހާދިސާގެ މައުލޫމާތު ލިބުމުން އެމްއެންޑީއެފް ފަޔާ ފައިޓަރުންވެސް ވަނީ އެތަނަށް އައިސް އަލިފާން ނިއްވުމުގެ މަސައްކަތް ކޮށްފައެވެ. މިނިވަންއަށް މައުލޫމާތު ދެމުން އެގެއިން ވާހަކަ ދެއްކި މީހާ ބުނީ މީގެ ކުރިންވެސް ސިނގިރޭޓް ބުރިއެއް އެއްލައިގެން މިފަދަ ހާދިސާއެއް ހިނގާފައިވާކަމަށެވެ.