ކުއްވެރިންނަށް ސަޕްލައި ކޮށްދޭކަމުގެ ތުހުމަތުގައި ހައްޔަރުކުރި ކަރެކްޝަންސްގެ 13 އޮފިސަރުންނަށް ދައުވާކުރުމަށް ފޮނުވައިފި

މޯލްޑިވްސް ކަރެކްޝަނަލް ސާވިސަސް ގެ ތެރެއިން ކުއްވެރިންނަށް ތަކެތި ސަޕްލައިކޮށްދޭ ކަމަށް ކުރެވޭ ތުހުމަތާ ގުޅިގެން ފުލުހުން ހިންގި ޙާއްސަ އޮފަރޭޝަނުގައި ހައްޔަރުކުރި ކަރެކްޝަންސްގެ 13 އޮފިސަރެއްގެ މައްޗަށް ދައުވާކުރުމަށް މިއަދު ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާކަމަށް މިއަދު ފުލުހުން ހާމަކޮށްފިއެވެ.

މާފުށީ ޖަލުގައި ތިބޭ ކުއްވެރިންނަށް މަސްތުވާތަކެއްޗާއި ފޯނު ސަޕްލައިކޮށްދިނުމުގައި ކަރެކްޝަންސްގެ އޮފިސަރުންތަކެއް ބައިވެރިވާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ފުލުހުން ދުރާލައި ރާވައިގެން ހިންގި ޙާއްސަ އޮޕަރޭޝަނުގައި ކުށްވެރިންނަށް ފޯނާއި މަސްތުވާތަކެއްޗާއި އެހެނިހެން ސާމާނު ފޯރުކޮށްދެމުން ދިޔަ ކަމުގެ ތުހުމަތުގައި ހައްޔަރުކުރި 13 އޮފިސަރުންގެ ތެރެއިން 11 މީހަކަށް ވަނީ ޝަރީއަތް ނިމެންދެން ބަންދުގައި ބޭތިއްބުމަށް ކޯޓުން އަމުރު ޖަހާދީފައެވެ.

ފުލުހުން ހިންގި ހާއްސަ އޮޕަރޭޝަނަށްފަހު  ހޯމް މިނިސްޓަރު އަލީ އިހުސާން އެ އޮޕަރޭޝަނާ ބެހޭ މައުލޫމާތު ދެއްވަމުން ވިދާޅުވެފައިވަނީ އެ މައްސަލާގައި 18 ކަރެކްޝަންސް އޮފިސަރުން ހިމެނޭ ކަމަށާއި އެ އޮފިސަރުންގެ އެކައުންޓުތަކަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާކަމަށެވެ. އަދި އޭގެތެރެއިން އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާކަމަށެވެ.